ވެރިކަންކުރާ ޕީއެންސީއަށް 100،000 މީހުން ހަމަކުރުމަށް ވަގު ފޯމް ފުރުމަކީ ވަރަށް ވިޔާނުދާ ލަދުވެތި ކަމެއް ކަމަށް އެ ޕާޓީގެ މަޖިލިސް މެމްބަރެއް ކަމަށްވާ އަސްމާ ރަޝީދު ވިދާޅުވެއްޖެ އެވެ.

ޕީއެންސީގެ މަޖިލިސް މެމްބަރުންގެ ވަޓްސްއެޕް ގްރޫޕެއްގައި މާފަންނު މެދު ދާއިރާގެ މެމްބަރު އަސްމާ މިއަދު ވިދާޅުވީ ވަގު ފޯމް ފުރުމުގެ ކަންތައްކުރީ އެ ޕާޓީގެ ޖަގަހައިގައި ކަމަށެވެ. އަދި އެކަންކުރީ ކޮންބައެއްކަން އެނގޭ ކަމަށް ވެސް ވިދާޅުވި އެވެ.

"އަޅުގަނޑަށް އެނގޭ ކުރި ބައެއް. ހިތާމައަކީ ޕީއެންސީ އެތެރެއިން މިކަން ކުރީމަ. މިއެއް ނޫން މީހުން އިތުރު ކުރާ ގޮތަކީ. ވަރަށް ވިޔާ ނުދާ، ލަދުވެތި ކަމެއް. ވަރަށް ލަދުވެސް ގަނޭ،" އަސްމާ ވިދާޅުވި އެވެ.

ޕީއެންސީގެ މެމްބަރުންގެ އަދަދު އިތުރުކުރަން ވަގު ފޯމްތަކެއް ހުށަހަޅަމުންދާ ކަމަށް ބުނުމުން ހޯރަފުށީ ދާއިރާގެ މެމްބަރު މުހައްމަދު އިސްމާއީލް ވަނީ އެކަންދޮގުކޮށް އެއީ އެ ޕާޓީން ދުވަހަކުވެސް ކުރާނެ ކަމެއް ނޫން ކަމަށް ވިދާޅުވެފަ އެވެ.

އޭނާ އެހެން ވިދާޅުވިފަހުން ކޮންމެ ދުވަހަކު ކަހަލަގޮތަކަށް އެ ޕާޓީއަށް ވެއްދުމަށް އިލެކްޝަންސް ކޮމިޝަނަށް ހުށަހަޅާފައިވާ ވަގު ފޯމްތައް އަންނަނީ ފާހަގަވަމުންނެވެ. އެގޮތުން އެންމެފަހުން މުހައްމަދު އިސްމާއީލް ހެކިވެ ސޮއިކޮށްފައިވާ ވަގު ފޯމެއް ވެސް ސޯޝަލް މީޑިއާގައި މިއަދު ވަނީ އާންމުވެފަ އެވެ.

އިދިކޮޅު އެމްޑީޕީގެ ގައުމީ މަޖިލީހުގެ ބައެއް މެމްބަރުންގެ އިތުރުން ވައިކަރަދޫ ދާއިރާގެ މެމްބަރު ހުސައިން ޒިޔާދު ވެސް ވަނީ ވަގަށް ޕީއެންސީއަށް ވައްދާފަ އެވެ. އެ މައްސަލާގައި ކަންބޮޑުވުންފާޅުކޮށް އިލެކްޝަންސް ކޮމިޝަނަށް ގޮސް އެމްޑީޕީން އިހްތިޖާޖުކުރުމުން އެ ކޮމިޝަނުން ނެރުނު ބަޔާނެއްގައި ބުނީ މެމްބަރު ޒިޔާދުގެ ފޯމަކީ ވަގު ފޯމެއްކަން ފާހަގަވި ހިސާބުން އެ ފޯމް ބާތިލްކޮށްފައިވާ ކަމަށެވެ.