ދުނިޔޭގެ އެންމެ ހުތުރު ޖަނަވާރުކަމަށް ބުނެވޭ ބްލޮބްފިޝް، ނިއުޒީލެންޑްގެ "ފިޝް އޮފް ދަ އިޔާ" ކަމަށް ވޯޓު ދެވިއްޖެ އެވެ.

ގާތްގަނޑަކަށް 12 އިންޗި (30 ސެންޓިމީޓަރު) އަށް ބޮޑުވާ މި ޖަނަވާރަށް ލޯބިން ކިޔަނީ މިސްޓަ ބްލޮބީ އެވެ. އަދި މިއީ އަގްލީ އެނިމަލް ޕްރިޒަވޭޝަން ސޮސައިޓީގެ ރަސްމީ މެސްކޮޓެވެ. މީގެ ބޮލަކީ ބޮޑު ބޯޅައެއް ފަދަ އެއްޗެކެވެ. ހަމުގެ ގޮތުގައި ހުންނަނީ ފަތްފަތްކޮށް ހުންނަ އެއްޗެކެވެ.

މިއީ ފުން ކަނޑުގައި އުޅޭ ޖަނަވާރެކެވެ. މައިގަނޑު ގޮތެއްގައި އުޅެނީ އޮސްޓްރޭލިއާގެ މައި އެއްގަމުގެ ދެކުނު އިރުމަތީ ސަރަޙައްދާއި، އޮސްޓްރޭލިއާގެ ޓަސްމޭނިއާ ރަށާއި، ނިއުޒީލެންޑްގެ ކައިރީގަ އެވެ.

މައުންޓެއިންސް ޓު ސީ ކޮންޒަވޭޝަން ޓްރަސްޓް ނަމަކަށް ކިޔާ ތިމާވެށި ހިމާޔަތްކުރުމަށް މަސައްކަތްކުރާ ޖަމްޢިއްޔާއިން ކޮންމެ އަހަރަކު ބާއްވާ ވޯޓުގައި ބްލޮބްފިޝް އެންމެ މަތިން ހޮވިފައިވާއިރު، 5،500 އަށްވުރެ ގިނަ ވޯޓުގެ ތެރެއިން 1،300 އާ ގާތްކުރާ އަދަދަކަށް އެމަހަށް އާންމުންގެ ވޯޓު ލިބިފައިވެ އެވެ.

ބްލޮބްފިޝް، އޭގެ ޠަބީޢީ މާޙައުލުގައި، ގާތްގަނޑަކަށް 2،000 ފޫޓުން 4،000 ފޫޓާ (600 މީޓަރުން 1،200 މީޓަރާ) ދެމެދުގެ ފުންމިނުގައި ހުންނަ ކަނޑުއަޑީގައި، ބްލޮބްފިޝް ފެންނަނީ އެހެން މަސްތަކެކޭ އެއްގޮތަށެވެ. ނަމަވެސް މަތީ ފެންގަނޑަށް ގެނެވޭ އިރު، އޭގެ ސިފަ ހިފެހެއްޓުމަށް ބޭނުންވާ ވަރަށް ފެނުގެ ޕްރެޝަ ނުހުންނާތީ، ބްލޮބްފިޝް ބަދަލުވަނީ މުށިކޮށް، ހިތާމަވެރި ސިފައެއް ހުންނަ ޖަނަވާރަކަށެވެ.