ރޯދަ މަހު ޑިސްކައުންޓާއި އެކުވެސް ކަރަންޓު ބިލުތައް ބޮޑުވީ ހޫނު ދުވަސްވަރެއް ވީމަ ކަމަށް ސްޓެލްކޯއިން ބުނެފި އެވެ.

ސަރުކާރުން ވަނީ މިދިޔަ އަހަރެކޭ އެއްގޮތަށް މި އަހަރުވެސް ކަރަންޓާއި ފެން ބިލުން ކަރަންޓު ބިލުން ޑިސްކައުންޓް ދީފަ އެވެ.

ނަމަވެސް ކަރަންޓު ބިލުތައް އިންތިހާއަށް ބޮޑުވެ، ގިނަ ބަޔަކު ދަނީ އެކަމުގެ ޝަކުވާ ކުރަމުންނެވެ. އެގޮތުން ރޯދަ މަހުގެ ޑިސްކައުންޓު ދިނުމަށް ކަމަށް ބުނެ ފެބްރުއަރީ މަހުގެ ބިލު އަވަހަށް ފޮނުވުމުން ނިމިދިޔަ މާޗް މަހު ކައިރި ކައިރީގައި ދެ ބިލު ދައްކަން ޖެހުމުން އެކަމުގެ ކަންބޮޑުވުން މީހުން ފާޅުކޮށްފައިވެ އެވެ.

މިކަމާ ގުޅިގެން ރައްޔިތުންގެ ޝަކުވާ ބޮޑުވުމުން ސްޓެލްކޯގެ މެނޭޖިން ޑިރެކްޓަރު ހުސައިން ފަހުމީ ކުރިން ވިދާޅުވީ ކައިރިކައިރީގައި ދެ ބިލު ފޮނުވީ ރައްޔިތުންގެ ފައިދާއަށް ކަމަށެވެ. އެގޮތަށް ބިލު ފޮނުވުމުން ރޯދަ މަހު ބޭނުން ކުރި ކަރަންޓު އެއް މަހުގެ ބިލުން ޑިސްކައުންޓާއެކު ލިބުމުގެ އިންތިޒާމު ހަމަޖެހިގެން ދާނެކަމަށް ފަހުމީ ވިދާޅުވި އެވެ.

ސްޓެލްކޯއިން ބުނީ އެހެން ރޯދަ މަހެކޭ އެއްގޮތަށް ގޭބިސީތަކުން ކަރަންޓް ބޭނުން ކުރާ މިންވަރު އިތުރުވުމާއި، ހޫނު މޫސުމާ ދިމާވުމުން ބިލުތައް ބޮޑު ކަމަށެވެ.

ފަހު ރޯދަ ދުވަހު މާލޭ ސަރަހައްދުގައި ކަރަންޓު ބޭނުންކުރި މިންވަރު އިތުރުވެފައިވާ ކަމަށް ސްޓެލްކޯއިން ބުނެފައިވެ އެވެ. އެގޮތުން ރޯދަމަހުގެ ފަހު ދުވަހު އެންމެ ގިނައިން ކަރަންޓު ބޭނުންކުރި ވަގުތުގައި 103،801 ކިލޯވޯޓުގެ ކަރަންޓު ވަނީ ބޭނުންކޮށްފަ އެވެ.

ބައެއް ފަރާތްތަކުން ކަރަންޓު ބިލު ބޮޑުވެ ސޯޝަލް މީޑިއާގައި ކަންބޮޑުވުން ފާޅު ކުރަމުން ބުނެފައިވަނީ ކަރަންޓު ބޭނުން ކުރާ މިންވަރު އިތުރު ނުވިޔަސް އަދި އެޕާޓްމެންޓު ބޭނުން ނުކޮށް ހުއްޓަސް ކަރަންޓު ބިލު ބޮޑުވެފައިވާ ކަމަށެވެ.

ސަރުކާރުން ރޯދައަށް ރައްޔިތުންނަށް ހިލޭ ބެހި މަސްދަޅު ކޭސްތަކުގެ ހަރަދު ސްޓެލްކޯ މެދުވެރިކޮށް ރައްޔިތުންގެ އަތުން ނަގަނީ ކަމަށްވެސް ބައެއް ފަރާތްތަކުން ވަނީ ތުހުމަތުކޮށްފަ އެވެ.

ރޯދަ މަހު ކަރަންޓާއި ފެން ބިލުން ޑިސްކައުންޓު ދީފައިވާއިރު ކަރަންޓަށްދޭ ޑިސްކައުންޓަށް ގާތްގަނޑަކަށް 160 މިލިއަން ރުފިޔާ ހޭދަ ކުރަންޖެހޭނެ ކަމަށް ސްޓެލްކޯއިން މީގެ ކުރިން ވަނީ އަންދާޒާ ކޮށްފަ އެވެ. އަދި މަސްދަޅު ކޭސް ރައްޔިތުންނަށް ބެހުމަށް 89 މިލިއަން ރުފިޔާ ހަރަދު ކުރި ކަމަށް ސަރުކާރުން ވަނީ ބުނެފަ އެވެ.