އީރާނުގެ ދެކުނުގެ ހޮރްމުޒްގާން ޕްރޮވިންސްގެ މިނާބް ސިޓީގައި ހުންނަ އަންހެން ކުދިންގެ ޕްރައިމަރީ ސްކޫލަކަށް އިޒްރޭލުން ދިން ވަރުގަދަ ހަމަލާއެއްގައި މަދުވެގެން 53 މީހުން މަރުވެފައިވާ ކަމަށް އެ ގައުމުގެ ރަސްމީ މީޑިއާތަކުން ރިޕޯޓްކޮށްފި އެވެ.

މިއީ އިޒްރޭލާއި އެމެރިކާ ގުޅިގެން އީރާނަށް ދެމުންދާ ވަރުގަދަ ހަމަލާތަކުގެ ސަބަބުން އާންމުންނަށް ލިބެމުންދާ ބޮޑެތި ގެއްލުންތަކުގެ ތެރެއިން ހިނގި ހިތާމަވެރި ހާދިސާއެކެވެ.

އީރާނުގެ ރަސްމީ ނިއުސް އެޖެންސީ "އިރްނާ" އިން ބުނި ގޮތުގައި، މިއަދު ދިން މި ހަމަލާގައި އިތުރު 63 މީހުންނަށް އެކިވަރުގެ އަނިޔާތައް ލިބިފައިވާއިރު، އިމާރާތުގެ ދަށުވެފައިވާ މީހުން ހޯދުމުގެ މަސައްކަތް ކަމާބެހޭ ފަރާތްތަކުން ދަނީ ހުއްޓުމެއް ނެތި ކުރަމުންނެވެ. މި ހަމަލާއަކީ މުޅި ސަރަހައްދުގެ މަސްރަހު ގޯސްވެފައިވާ ވަގުތެއްގައި އެމެރިކާ އާއި އިޒްރޭލު ގުޅިގެން އީރާނުގެ އެކި ސަރަހައްދުތަކަށް ދެމުންދާ އަސްކަރީ ހަމަލާތަކުގެ ބައެކެވެ.

އީރާނުގެ ހާރިޖީ ވަޒީރު އައްބާސް އަރަގްޗީ ވަނީ މި ހަމަލާގައި ސުންނާފަތިވެފައިވާ ސްކޫލްގެ ފޮޓޯއެއް ހިއްސާކުރައްވައި، މިއީ "މައުސޫމް ކުޑަކުދިން" މަރާލުމަށް ދިން ރަހުމުކުޑަ ހަމަލާއެއް ކަމަށް ސިފަކުރައްވާފަ އެވެ. އަދި އީރާނުގެ ރައްޔިތުންނާ ދެކޮޅަށް ހިންގާ މިފަދަ ޖަރީމާތަކަށް ބަދަލުހިފުމެއް ނެތި ދޫކޮށްނުލާނެ ކަމަށް އެކްސްގައި ކުރެއްވި ޕޯސްޓެއްގައި އޭނާ ވިދާޅުވި އެވެ.

މީގެ އިތުރުން، އީރާނުގެ ހާރިޖީ ވުޒާރާގެ ތަރުޖަމާނު އިސްމާއީލް ބަގާއީ ވެސް ވަނީ މި "ބޮޑު ޖަރީމާ" ކުށްވެރި ކުރައްވައި، އދ.ގެ ސަލާމަތީ މަޖިލީހުން މިކަމާ މެދު ފިޔަވަޅު އެޅުމަށް ގޮވާލައްވާފަ އެވެ.

އީރާނުގެ "މެހެރް" ނިއުސް އެޖެންސީން ރިޕޯޓްކުރި ގޮތުގައި، ވެރިރަށް ތެހެރާންގެ އިރުމަތީ ފަރާތުގައި ހުންނަ ސްކޫލަކަށް އިޒްރޭލުން ދިން އެހެން ހަމަލާއެއްގައި ވެސް ދެ ދަރިވަރުން ވަނީ މަރުވެފަ އެވެ.

މި ހަމަލާތަކުގެ ސަބަބުން އެމެރިކާ އާއި އިޒްރޭލުން ބުނަމުންދަނީ ހަމަލާ ދެނީ ހަމައެކަނި އަސްކަރީ އަމާޒުތަކަށް ކަމަށާއި، މަގުސަދަކީ އީރާނުގެ ސަރުކާރަށް އަދަބު ދިނުން ކަމަށެވެ. ނަމަވެސް، އާންމުން މަރުވަމުންދާތީ، މިއީ ބައިނަލްއަގުވާމީ ގާނޫނުތަކާ ހިލާފު، އީރާނުގެ ރައްޔިތުންނަށް ދެވޭ އުދުވާނީ ހަމަލާއެއްގެ ގޮތުގައި އީރާނު ސަރުކާރުން ބައިނަލްއަގުވާމީ މައިދާނުގައި ވަކާލާތު ކުރާނެ އެވެ.

ސުކޫލުތަކަށް ދިން މި ހަމަލާތަކާ ގުޅިގެން އެމެރިކާ ނުވަތަ އިޒްރޭލުން އަދި މިހާތަނަށް އެއްވެސް އެއްޗެއް ބުނެފައެއް ނުވެ އެވެ.

2025 ވަނަ އަހަރުގެ ޖޫން މަހު އެމެރިކާ އާއި އިޒްރޭލުން އީރާނަށް ދިން ހަމަލާތަކުގައި ވެސް އާންމުންގެ ގިނަ ބަޔަކު މަރުވެފައި ވެއެވެ. 12 ދުވަހަށް ދެމިގެންދިޔަ އެ ހަނގުރާމައިގައި އީރާނުގެ އެތައް ހާސް ރައްޔިތުންނެއް މަރުވެ އަދި އެތައް ބަޔަކު ޒަޚަމްވެ، ގައުމުގެ އުމްރާނީ ވަސީލަތްތަކަށް ބޮޑެތި ގެއްލުންތަކެއް ލިބިފައިވާ ކަމަށް އީރާނުގެ ހެލްތު މިނިސްޓްރީން ބުނެފައި ވެއެވެ.