ކޮވިޑްގެ ޙާލަތު މިވަނީ ރައްޔިތުންގެ "ފަރުދީ ޒިންމާ" އަދާކުރުމަކުން އެކަނި ހައްލުވާ މިންވަރަށްވުރެ ގޯސްވެފައިވާ ކަމަށާއި އެންމެ ބޮޑަށް އިސްލާޙު ކުރަންވީ ސަރުކާރުގެ ސިޔާސަތުތައް ކަމަށް މާލޭ ސިޓީގެ އިންތިހާބީ މޭޔަރު ޑރ. މުހައްމަދު މުއިއްޒު ވިދާޅުވެއްޖެ އެވެ.

ރާއްޖޭގައި ކޮވިޑްގެ ހާލަތު އިތުރަށް ގޮސްފައިވާތީ ޑރ. މުއިއްޒު ކުރެއްވި ޓުވީޓްގައި ވިދާޅުވީ ރައްޔިތުން ފަރުދީ ޒިންމާ އަދާކޮށްގެން މިހާރު ކޮވިޑް ހާލަތު އިތުރަށް ރަނގަޅު ނުވާނެ ކަމަށާއި މި ވަގުތު އެންމެ ބޮޑަށް އިސްލާހު ކުރަންޖެހިފައި ވަނީ ސަރުކާރުގެ މިކަމާ ގުޅުންހުރި ޚާރިޖީ، ދާޚިލީ އަދި އިގުތިސާދީ ސިޔާސަތުތަކަށް ކަމަށެވެ.

"ކަން މިހެން އޮތް ނަމަވެސް، ރައްކާތެރިކަމުގެ ފިޔަވަޅުތައް އަޅައި، ކަމާބެހޭ ފަރާތްތަކުން އަންގާ އެންގުތަކަށް ބޯލަނބައި، ފަރުދީ ޒިންމާ އަދާކުރުމުގެ މިސާލު ދައްކާ ބައެއްގެ ގޮތުގައި ވުމަށް އިލްތިމާސްކުރަން،" އޭނާ ވިދާޅުވި އެވެ.

މުއިއްޒު މިއަދު ކުރެއްވި ޓްވީޓެއްގައި މިހެން ވިދާޅުވީ މާލެ އާއި އަދި މުޅި ރާއްޖޭގައި ވެސް ރެކޯޑް މިންވަރަކަށް ކޮވިޑްގެ ކޭސްތައް ގިނަވެ ރައްކާތެރިކަމުގެ ފިޔަވަޅުތައް ވަރުގަދަކޮށްފައި ވަނިކޮށެވެ.

ކޮވިޑްގެ ކޭސްތައް ކުއްލިއަކަށް އިތުރުވެ، ހާލަތު މާ ބޮޑަށް ގޯސްވީ ސަރުކާރުގެ ކަމާބެހޭ އިދާރާތަކުން ގެންގުޅުނު ސިޔާސަތުތަކުގެ ސަބަބުން ކަމަށް ބުނެ އާންމުންގެ ފާޑުކިއުން ވެސް ވަނީ އަމާޒުވެފަ އެވެ.

ބަލިޖެހޭ މީހުންގެ އަދަދު ގިނަވެ ހޮސްޕިޓަލްތަކަށް ވެސް މިހާރު ވަނީ ބާރުބޮޑުވެ، ފަރުވާ ދިނުމުގައި ދަތިތައް ކުރިމަތިވެދާނެ ކަމުގެ ކަންބޮޑުވުން އިތުރުވެފަ އެވެ.