ބޮލީވުޑްގެ މަޝްހޫރު އެކްޓަރު ސިދާތު މަލްހޯތުރާ، އޭނާގެ އަންހެނުން ކިއާރާ އަދުވާނީއާ އެކު ރާއްޖޭގައި ހޭދަކުރި އުފާވެރި ޗުއްޓީގެ ހިތްގައިމު ފޮޓޯތަކެއް ސޯޝަލް މީޑިއާގައި ހިއްސާކޮށްފި އެވެ. މި ފޮޓޯތަކުން ފެނިގެންދަނީ މި ދެމަފިރިން ރާއްޖޭގެ ހިތްގައިމު މާހައުލުގައި ހަމަޖެހިލައިގެން ވަގުތު ހޭދަކުރަމުންދާ މަންޒަރުތަކެވެ.

ސިދާތު މަލްހޯތުރާގެ ޗުއްޓީ ފޮޓޯތައް

ސިދާތުގެ އިންސްޓަގްރާމްގައި ހިއްސާކުރި ފޮޓޯތަކާއެކު އޭނާ ލިޔެފައިވަނީ، "އިރުއަރާ ވަގުތުގެ ފަތާލުމުން ފެށިގެން އިރުއޮއްސޭ ވަގުތުގެ ދަތުރުތަކާ ހަމައަށް... މި ދަތުރުގައި ހުރިހާ އުފަލެއް ލިބިއްޖެ،" މިފަދައިންނެވެ. މި ފޮޓޯތަކުން ރާއްޖޭގެ ގުދުރަތީ ރީތި މަންޒަރުތަކާއި، ގޮނޑުދޮށުގައި ހޭދަކުރި ވަގުތުތަކާއި، މޫދުއަޑީގެ ރީތިކަން ބަލާލުމަށް ކުރި ސްނޯކްލިންގްގެ އިތުރުން، ދެމަފިރިން އެކުގައި ހޭދަކުރި ހާއްސަ ރޭގަނޑުގެ ކެއުންތައް ފެނިގެންދެ އެވެ. އެއް ފޮޓޯއަކުން ފެންނަނީ ކަނޑުމަތީގައި އުޅަނދެއްގެ މަތީގައި ސިދާތާއި ކިއާރާ ތިބި މަންޒަރެވެ.

https://www.instagram.com/p/DXwl4aLDcVx/?utm_source=ig_web_button_share_sheet

މީގެ އިތުރުން، ކިއާރާވެސް ވަނީ އޭނާގެ އިންސްޓަގްރާމް ސްޓޯރީ މެދުވެރިކޮށް މި ދަތުރުގެ ބައެއް މަންޒަރުތައް ދައްކާލާފަ އެވެ. އޭގެ ތެރޭގައި ރިސޯޓަށް ދިއުމަށް ކުރި ސީޕްލޭން ދަތުރާއި، މީރު ކާނާތަކުގެ ފޮޓޯތައް ހިމެނެ އެވެ. ނަމަވެސް، އެންމެ ބޮޑު ސަމާލުކަމެއް ހުއްޓުނީ ފޮޓޯގެ ފަހަތުން ސިދާތު އެމީހުންގެ ތުއްތު ދަރިފުޅާއެކު ސަކަރާތްޖަހަން އިން މަންޒަރަށެވެ.

މީގެ ކުޑަދުވަސްކޮޅެއް ކުރިން ސިދާތު ވަނީ ކިއާރާއާއެކު މަސައްކަތެއް ކުރަމުންދާކަމުގެ އިޝާރާތެއްވެސް ދީފަ އެވެ. އެގޮތުން ޝޫޓިންގް ސެޓެއްގައި ނަގާފައިވާ ފޮޓޯއެއް ހިއްސާކުރަމުން އޭނާ ވަނީ "މި ޝޫޓްކުރަނީ ކާކާއެކުތޯ؟" ސުވާލުކޮށް ސަޕޯޓަރުންގެ ޝައުގުވެރިކަން އިތުރުކޮށްފަ އެވެ.

ކުރިއަށް ހުރި މަސައްކަތްތައް

މި ދެ ތަރިންގެ ކުރިއަށްހުރި މަސައްކަތަށް ބަލާއިރު، ކިއާރާ ދެން އެންމެ އަވަހަށް ފެނިގެންދާނީ އެކްޓަރު ޔަޝްއާއެކު 'ޓޮކްސިކް' އިންނެވެ. މި ފިލްމުގެ ޑައިރެކްޓަރު ގީތޫ މޯހަންދާސް ބުނިގޮތުގައި، ފިލްމުގެ 'ނާދިއާ' ގެ ރޯލަށް އޭނާގެ ފުރަތަމަ އަދި ހަމައެކަނި ޗޮއިސްއަކީ ކިއާރާ އެވެ.

މީގެ އިތުރުން، ސިދާތާއި ކިއާރާ އެކުގައި ފެނިގެންދާ ފިލްމު 'ވަން' އަށްވެސް ގިނަ ބަޔަކު އަންނަނީ އިންތިޒާރު ކުރަމުންނެވެ. މި ފިލްމު ރިލީޒްކުރުން މިހާރު ތާވަލުކޮށްފައިވަނީ 28 އޯގަސްޓް 2026 އަށެވެ.