މާލޭ ސިޓީ ކައުންސިލްގެ ޑެޕިއުޓީ މޭޔަރު ހޮވުން ފަސްކޮށްފި އެވެ.

އޮންލައިންކޮށް މިއަދު ބޭއްވި ރަސްމިއްޔާތެއްގައި މާލެ ސިޓީގެ އާ މޭޔަރާއި ކައުންސިލަރުން ވަނީ ހުވާކުރައްވާފަ އެވެ.

ހުވާ ކުރުމުގެ ރަސްމިއްޔާތަށްފަހު މާލެ ސިޓީ ކައުންސިލްގެ މި ދައުރުގެ ފުރަތަމަ ބައްދަލުވުމުގއި ވާހަކަ ދައްކަވަމުން މޭޔަރު ޑރ. މުހައްމަދު މުއިއްޒު ވިދާޅުވީ މިއަދުގެ ޖަލްސާ ކުރިޔަށް ގެންދަނީ އޮންލައިންކޮށް ކަމަށް ވާތީ ސިއްރު ވޯޓަކުން އިންތިހާބު ކުރަން ޖެހޭ ޑެޕިއުޓީ މޭޔަރު އިންތިހާބުކުރުން ކުރިޔަށް ގެންދެވެން ނެތް ކަމަށެވެ. އަދި ޑެޕިއުޓީ މޭޔަރަކު ހޮވުން ފަސްކުރުމަށް ލޯކަލް ގަވަމެންޓް އޮތޯރިޓީ (އެލްޖީއޭ)އިން އަންގާފައިވާ ކަމަށް ވެސް މުއިއްޒު ވިދާޅުވި އެވެ.

ގާނޫނު ބުނާ ގޮތުން ސިޓީ ކައުންސިލްތަކާއި އަތޮޅު ކައުންސިލް އަދި ރަށު ކައުންސިލްތަކުގެ ނައިބު ހޮވާނީ ހުރިހާ މެންބަރުން ބައިވެރިވާ ބައްދަލުވުމެއްގައި މެންބަރުންގެ މެދުގައި ނަގާ ސިއްރު ވޯޓަކުންނެވެ.

މާލޭގެ ޑެޕިއުޓީ މޭޔަރު އިންތިހާބު ކުރުން ފަސްވެފައިވާއިރު މާލޭގެ މެޖޯރިޓީ އޮތް އިދިކޮޅު ޕީޕީއެމްގެ މެންބަރުންގެ މެދުގައި ވަރުގަދަ ވާދަވެރި ކަމެއް އެބައޮތެވެ. އެގޮތުން ހުޅުމާލެ ދާއިރާގެ މެންބަރު އިބްރާހިމް ޝުޖާއު އާއި ވިލިމާލެ ދާއިރާގެ މެންބަރު ނަހުލާ އަލީ މާފަންނު މެދު ދާއިރާގެ މެންބަރު އަހުމަދު ނަރީޝް ވެސް ވަނީ އެ މަގާމަށް ޝައުގުވެރިކަން ފާޅުކޮށްފަ އެވެ

މިއީ ރައްޔިތުންގެ ސީދާ ވޯޓަކުން މޭޔަރެއް އިންތިހާބު ކުރި ފުރަތަމަ ފަހަރެވެ. އަދި މިއީ، އިންތިހާބު ކުރެވިގެން މާލެ ސިޓީއަށް ހޮވޭ ހަތަރު ވަނަ ކައުންސިލް އެވެ. އަދި ލާމަރުކަޒީ ގާނޫނަށް ގެނެވުނު އިސްލާހުތަކާއެކު މި ކައުންސިލްގެ މަގާމުގެ މުއްދަތަކީ ފަސް އަހަރެވެ.