ޕާކިސްތާނުގެ ޑްރަގް ނެޓްވޯކަކުން ރަޙީނުކޮށްފައި ހުރިކަމަށް ފުލުހުން ބުނާ ހދ. ނޮޅިވަރަންފަރު، މޯނިންގްސަން، މިސްބާހު މުހައްމަދާ ގުޅުވައި އާންމުކުރި މައުލޫމާތަކީ ތެދު ކަމަށާއި އެއީ ތެދުކަން ސާބިތުކޮށްދެވޭނެ ހެކި އެބަހުރި ކަމަށް ފުލުހުން ބުނެފި އެވެ.

ބައިނަލްއަގުވާމީ ޑްރަގް ނެޓްވޯކަކުން ރަހީނު ކޮށްފައިވާ ކަމަށް ފުލުހުން ބުނާ މިސްބާހުގެ ކުރު ވީޑިއޯއެއް އިއްޔެ ވަނީ ސޯޝަލް މީޑިއާގައި އާއްމުވެފަ އެވެ. އެ ވީޑިއޯގައި މިސްބާހު ބުނެފައި ވަނީ އޭނާއަކީ ޑްރަގުގެ އެއްވެސް ނެޓްވޯކަކާ ގުޅުމެއް އޮތް މީހެއް ނޫން ކަމަށާއި އޭނާއާ ޑްރަގާ ގުޅުވައިގެން ފުލުހުން ދީފައި ވަނީ ދޮގު މައުލޫމާތު ކަމަށެވެ.

އެ ވިޑިއޯއާ ގުޅިގެން ފުލުހުން މިއަދު ބުނީ، މިސްބާހާ ގުޅޭ ގޮތުން އާންމު ކޮށްފައި ވަނީ ތެދު މައުލޫމާތު ކަމަށެވެ. އަދި ފުލުހުން އާންމުކުރި މައުލޫމާތާ ގުޅޭ ހެކި ފުލުހުންގެ އަތުގައި ހުރި ކަމަށެވެ. އާންމު ކޮށްފައިވާ ވީޑިއޯ އިން ފެންނަނީ މިސްބާހު ކަމަށް ޔަގީން ކުރެވޭ ކަމަށް ވެސް ފުލުހުން ބުނެ އެވެ.

ވީޑިއޯއިން ފެންނަނީ މިސްބާހުކަން އޭނާގެ އާއިލާއިން ވަނީ ކަށަވަރުކޮށްދީފަ އެވެ. އަދި އާއިލާއިން ވެސް ބުނީ މިސްބާހަކީ މަސްތުވާތެކި ބޭނުންކުރުމާއި އެ ވިއްކުމުގައި ވަރަށް ފުޅާކޮށް ހަރަކާތްތެރިވާ މީހެއް ކަމަށްވުމުން އޭނާއާ ޑްރަގް ނެޓްވޯކުތަކާ ގުޅުން އޮންނާނެ ކަމަށެވެ.

ފުލުހުން މިސްބާހު ހޯދަން ފެށީ އޭނާ ގެއްލިގެން އާއިލާއިން ފުލުހުންނަށް އެންގުމުންނެވެ. އޭނާ ހޯދަން އިއުލާންކުރީ މިދިޔަ މެއި މަހުގެ 14 ވަނަ ދުވަހު އެވެ.އޭގެ ފަހުން ފުލުހުން ބުނެފައި ވަނީ އުމުރުން 25 އަހަރުގެ މިސްބާހު ހުރީ ޕާކިސްތާނުގައި ކަމަށެވެ. ނޮވެމްބަރު 11، 2020 ވަނަ ދުވަހުގެ ރޭ ފްލައި ދުބާއީގެ ބޯޓަކުން ދުބާއީއަށް މިސްބާހު ގޮސްފައިވާ ކަމަށް އިމިގްރޭޝަންގެ ރެކޯޑްތަކުން ދައްކާ ކަމަށެވެ.

އޭނާ ދުބާއީއަށް ދިޔައީ ފުޅާ ދާއިރާއެއްގައި ރާއްޖެއަށް މަސްތުވާތަކެތި އެތެރެކޮށް އެ ތަކެތީގެ ވިޔަފާރި ކުރާ ނެޓްވޯކްތަކެއް ރާއްޖޭގައި ހިންގި، ސ. ހުޅުދޫ، ދޭލިޔާގެ، އިރުފާން ތަގިއްޔާއެކު އެވެ. އޭގެ ފަހުން އިރުފާނު ރާއްޖެ އައީ އެވެ. އަދި ފަހުން މިސްބާހް ދުބާއީން ޕާކިސްތާނަށް ދިޔައީ އެވެ. އޭނާ ޕާކިސްތާނަށް ދިޔައީ ރާއްޖެ އެތެރެ ކޮށްފައިވާ މަސްތުވާތަކެތީގެ ފައިސާގެ ކަންކަން ނިމެންދެން އިރުފާނަށް މަސްތުވާތަކެތި ފޮނުވި ބޭރުގެ ނެޓްވޯކްގެ ބެލުމުގެ ދަށުގައި "ގެރެންޓަރާ" އެއްގެ ގޮތުގައި ހުރުމަށެވެ.