ޑާކް ރެއިން އެންޓަޓެއިންމެންޓަށް 14 އަހަރު ފުރުމާ ގުޅިގެން "ޑާކް ރެއިން ޝޯޓްސް"ގެ ނަމުގައި އުފެއްދި ފުރަަތަމަ ފިލްމު "ދައުވަތު" އާއި ދެވަނަ ފިލްމު "އަނގުރު" މީޑިއާނެޓްގެ މަލްޓި ސްކްރީނުގަައި ދެއްކުމަށް ނިންމައިފި އެވެ.

ޑާކް ރެއިން އިން ބުނީ ފިލްމު "އަނގުރު" މަލްޓިސްކްރީންގައި ރިލީޒްކުރުމަށް ނިންމާފައި ވަނީ މިމަހުގެ 14ގައި ކަމަށާއި ”ދައުވަތު“ ރިލީޒް ކުރާނީ ޖުލައި މިމަހުގެ 21ގައި ކަމަށެވެ.

ޑާކްރެއިން ޝޯޓްސްގެ ދަށުން އުފައްދާފައިވާ ކުރު ފިލްމް "އަނގުރު" އަކީ 10 މިނެޓްގެ ފިލްމެކެވެ.

ޖުމްލަ ގޮތެއްގައި ފިލްމު ފާހަގަ ކުރެވެނީ ނޭވާ ހިފަހައްޓާލަންޖެހޭ ކަންތައްތަކެއް ހިމެނުނު، އިބުރަތްތެރި ވާހަކައެއްގެ މައްޗައް ބިނާކޮށް ހަދާފައިވާ ފިލްމެއް ގޮތަށެވެ. އެގޮތުން ދިރިއުޅުގައި ހިނގާ ކަންކަން ލާމެހިފައިވާ މިންވަރު މިފިލްމުން ދައްކުވައިދެ އެވެ.

ކުރު ފިލްމު އަނގުރުގެ ޕޯސްޓަރު

އަލީ ޝިފާއު (ޗިއްޕެ) ލިޔެ ޑައިރެކްޓްކޮށް ގެނެސްދޭ މި ފިލްމުގެ ތަރިންގެ ގޮތުގައި ހަރަކާތްތެރި ވާނީ ލައިފްޓައިމް އެޗީވްމަންޓް އެވޯޑު ހޯދާފައިވާ ކުޅަދާނަ ފިލްމީ ތަރި ހަސަން މަނިކް (ރޯނު ހަސަން) އާއި ބަތަލާ އާމިނަތު ސިލްނާ އެވެ.

އަލީ ޝިފާއު (ޗިއްޕެ) ލިޔެ، ޑައިރެކްޓްކުރި "ދައުވަތު" އަކީ ސަންސްޕެންސްތަކާއި ޓްވިސްޓްތަކުން ފުރިފައިވާ ފިލްމެކެވެ. މިފިލްމުގައި ފެނިގެންދާ ކާސްޓުންނަކީ އަހުމަދު ސުނީ އާއި މަރިޔަމް ޝިފާ އާއި ހޫދު އިބްރާހީމެވެ.

"އަނގުރު" އަދި "ދައުވަތު" ޕްރޮޑިއުސްކުރީ އައިޝަތު ފުއާދު ތައުފީގު އާއި މުހައްމަދު އަލީ (މޮގާ) އެވެ.

ކުރު މި ދެ ފިލްމު ވެސް ވަނީ ޑާކްރެއިންގެ ޔޫޓިއުބް މެދުވެރިކޮށް ބެލުންތެރިންނަށް ބަލާލުމުގެ ފުރުސަތު މީގެ ކުރިން ލިބިފަ އެވެ.

ކޮވިޑް-19 އާ ގުޅިގެން އާޓިސްޓުންނަށް ވަރަށް ބޮޑެތި ދަތިތަކެއް ކުރިމަތިވަމުންދާ ދަނޑިވަޅެއްގައި އެ ޕްރޮޖެކްޓަކީ އާޓިސްޓުންނަށް ވެސް ސަޕޯޓެއް ދިނުމަށް ފެށި ޕްރޮޖެކްޓެއް ކަމަށް ޑާކްރެއިން އިން ބުންޏެވެ.