ޑުވޭން ޖޯންސަން (ދަ ރޮކް)ގެ ކުރިއަށް އޮތް ފިލްމު "ރެޑް ނޯޓިސް" އަންނަ ނޮވެމްބަރު މަހު ރިލީޒްކުރަން ނިންމައިފި އެވެ.

"ރެޑް ނޯޓިސް" ފިލްމުގައި ޑުވޭން ޖޯންސަންގެ އިތުރުން ގަލް ގަޑޯތް އަދި ރަޔާން ރޭނޯލްޑް ފެނިގެންދާނެ އެވެ. މިފިލްމު ނެޓްފްލިކްސްއިން ނެރުމަށް ނިންމާފައި ވަނީ އަންނަ ނޮވެމްބަރު މަހު 12 ވަނަ ދުވަހު އެވެ.

ފިލްމު "ރެޑް ނޯޓިސް" އާ ބެހޭ ގޮތުން ގަލް ގަޑޯތްކުރި ޓުވީޓެއްގައި ބުނެފައިވަނީ "ނެޓްފްލިކްސް އެންމެ ބޮޑު އެއް ފިލްމު ރެޑް ނޯޓިސް ބެލުންތެރިން ބަލާނެ ވަގުތަކަށް ކެތްމަދުވެފައިވާ ކަމަށް. ޑުވޭން ޖޯންސަން އާއި ރަޔާން ރޭނޯލްޑާއެކީ މަސައްކަތް ކުރުމަށް ވަރަށް ފަސޭހަ،" އޭނާ ބުންޏެވެ.

މި ފިލްމުގައި ޖޯންސަން ފެނިގެންދާނީ އެފްބީއައިގައި މަސައްކަތް ކުރާ މީހެއްގެ ރޯލުންނެވެ. ގަލް ފެނިގެންދާނީ ބޮޑު ވަގެއްގެ ގޮތުގައި ކަމަށާއި ރަޔާން ފެނިގެންދާނީ ކޯންމޭން އެއްގެ ބައިންނެވެ.

ރެޑް ނޯޓިސް މީގެ ކުރިން އޮތީ ބިޑްއެއްގެ ދަށުން ޔުނިވާސަލްގެ ޕްރޮޖެކްޓެއްގެ ގޮތުގަ އެވެ. ނަމަވެސް ޔުނިވާސަލް ސުޓޫޑިއޯއިން ފިލްމު ގަތުމަށް ހުށަހަޅާފައިވާ އަގާ މެދުގައި ހިތްހަމަ ނުޖެހިގެން ދެ ވަނަ ވިސްނުމަކަށް ދިޔުމަށް ނިންމީ ކަމަށެވެ. އެގޮތުން މިހާރު މިފިލްމު ވަނީ ނެޓްފްލިކްސްއަށް ވިއްކާލާފަ އެވެ.