"ގިރިޓީ ލޯބި"ގެ ފުރަތަމަ ލަވަ ނެރެފި

ޑާކްރެއިން އެންޓަޓެއިންމެންޓުން މިހާރު މަސައްކަތް ކުރަމުންގެންދާ ވެބް ސީރީޒް "ގިރިޓީ ލޯބި"ގެ ފުރަތަމަ ލަވަ "ދީފާ"ގެ ލަވަ ނެރެފި އެވެ.

އެ ލަވަ މިހާރު ސައުންޑް ކްލައުޑްގެ އިތުރުން ޔޫޓިއުބް މެދުވެރިކޮށް ވެސް އަޑު އަހާލެވޭނެ އެވެ.

"ދީފާ" މި ލަވަ ކިޔާފައިވަނީ މަޝްހޫރު ލަވަކިޔުންތެރިޔާ ފަތުހުއްލާ އަބްދުލް ފައްތާހު (ފަތޯ) އެވެ. އެ ލަވައިގެ ލިރިކްސް އަދި މިއުޒިކް ވެސް ހެދީ އޭނާ އެވެ.

"ގިރިޓީ ލޯބި" ވެބް ސީރީޒަކީ އައިޝަތު ފުއާދު ތައުފީގު އަދި މުހައްމަދު ޢަލީ (މޮގާ) ޕްރޮޑިއުސްކޮށް، އަލީ ޝިފާއު (ޗިއްޕެ) ޑައިރެކްޓްކުރާ ސީރީޒެކެވެ.

މިސީރީޒުގެ އެންމެ ފުރަތަމަ ނެރުނު ލަވައާ ބެހޭ ގޮތުން މުހައްމަދު އަލީ (މޮގާ) ލަވަ ރިލީޒްކުރުމާއެކު އާންމުންގެ ބޮޑު ތަރުހީބެއް ލިބެމުން އަންނަ ކަމަށެވެ.

އިތުރަށް މޮގާ ބުނީ، އަންނަ ހަފްތާގެ ހޯމަ ދުވަހު ދެވަނަ ލަވައެއް ބެލުންތެރިންނަށް ދޫކޮށްލަން ނިންމާފައިވާ ކަމަށާއި ޝޫޓިން ބާރު ސްޕީޑުގައި ކުރިއަށްދާ ކަމަށެވެ.

މަޝްހޫރު ލިޔުންތެރިޔާ އަހުމަދު ޒަރީރުގެ ވާހަކަ އަކަށް ހަދާ "ގިރިޓީ ލޯބި"ގެ މެއިން ކާސްޓުންގެ ތެރޭގައި "އެހެނަސް" އިން ވިދާލި ވިޝާލް (ރޯމަން) އާއި އައިމިނަތު ރަޝްފާ (އާޝާ)ގެ އިތުރުން އިތުރުން މުހައްމަދު މަނިކު، މުޙައްމަދު ފައިސަލް އަދި އާދަމް ރިޒްވީ (ރެކްސް) ހިމެނެ އެވެ. މީގެ އިތުރުން މުޅިން އާ މޫނުތަކެއް ވެސް މި ސީރީޒުން ފެންނާނެ އެވެ.

މޮގާ ބުނީ، ސީރީޒް ދައްކާނީ އަދި ކޮން ޕްލެޓްފޯމް އެއްގައި ކަމެއް ބުނަން ނޭންގޭ ކަމަށާއި ރަނގަޅު އަގެއް ކިޔާ ބަޔަކަށް މަސައްކަތް ނިމުމުން ދޫކޮށްލަން ގަސްދުކުރާ ކަމަށެވެ.

ދިވެހި ފިލްމީ ދާއިރާގައި މިހާރު އެންމެ ގިނަ މަސައްކަތް ކުރަމުން އަންނަ ޑާކްރެއިންގެ ގިނަ ފިލްމުތަކެއް ކުރިޔަށް ވެސް ރިލީޒްވާން އެބަ ހުއްޓެވެ. އޭގެ ތެރޭގައި "ނޮވެމްބަރު" އާއި "ބަޅިނދު" ގެ އިތުރުން "ބީވީމާ" ވެސް ހިމެނެ އެވެ. އަދި މަސައްކަތް ނުފަށާ ގިނަ ޕްރޮޖެކްޓްތަކެއް ވެސް އެބަހުއްޓެވެ.