ޔާޝްރާޖް ފިލްމްސް (ވައިއާރްއެފް) އިން މީގެ 14 އަހަރު ކުރިން ގެނެސްދިން ކާމިޔާބު ރޮމޭންޓިކް ކޮމެޑީ "ބަންޓީ އޯރް ބަބްލީ" ގެ ދެވަނަ ބައި އަންނަ ނޮވެމްބަރު މަހު ރިލީޒް ކުރުމަށް ނިންމައިފި އެވެ.

ކުރިން މިދިޔަ އަހަރު ޖޫން މަހު 26 ގައި ރިލީޒްކުރަން ތާވަލުކުރި ފިލްމު ރިލީޒްކުރުން ފަސްކުރީ ކޮވިޑް-19 ގެ ބަލިމަޑުކަމާއި ގުޅިގެން ފިލްމުގެ މަސައްކަތް ނިންމާނުލެވުމާއި ސިނަމާތައް ބަންދު ކުރުމުންނެވެ.

ފިލްމު ރިލީޒްކުރާ ތާރީހު އަލުން އިއުލާނުކޮށްފައި މިވަނީ އަންނަ އޮކްޓޯބަރު މަހު 22 އިން ފެށިގެން މަހާރާޝްތުރާގައި ސިނަމާތައް ހުޅުވަން އިންޑިއާ ސަރުކާރުން ހުއްދަ ދިނުމާއި ގުޅިގެންނެވެ.

"ބަންޓީ އޯރް ބަބްލީ 2" އަކީ 2005 ވަނަ އަހަރު ޔާޝް ރާޖް ފިލްމްސް އިން ޕްރޮޑިއުސްކޮށް ޝާދު އަލީ ޑައިރެކްޓްކޮށް ގެނެސްދިން ކްރައިމް ކޮމެޑީ "ބަންޓީ އޯރް ބަބްލީ"ގެ ސީކުއެލްއެކެވެ.

މިފަހަރުގެ ފިލްމު ޝަރްމާ ޑައިރެކްޓް ކޮށްފައިވާއިރު ސައިފް އަލީ ޚާންއާއި ރާނީ މުކަރްޖީއާއި ސިދާންތު ޗަތުރްވެޑީގެ އިތުރުން އަލަށް ތަޢާރަފުކުރާ ބަތަލާ ޝަރްވަރީ ވާގް މައިގަނޑު ރޯލުތަކުން ފެނިގެންދާނެ އެވެ.

ކުރީގެ ފިލްމުގައި ރާނީއާއެކު އަބީޝެކް ފެނުނު ނަމަވެސް މި ފިލްމުގައި ރާނީއާއެކު ސައިފް ފެނިގެންދާއިރު މިއީ 12 އަހަރަށްފަހު ރާނީއާއި ސައިފް އެކުގައި ފެނިގެންދާ ފުރަތަމަ ފިލްމުކަން ފާހަގަކޮށްލެވެ އެވެ. އެ ދެމީހުން އެންމެ ފަހުން އެއްކޮށް ފެނިފައިވަނީ 2008 ގެ ފިލްމު "ތޯޅާ ޕިޔާރް ތޯޅާ މެޖިކް" އިންނެވެ.

https://www.youtube.com/watch?v=tVqLmnjEDKY

ސައިފް އާއި ރާނީގެ ކާމިޔާބު ޖޯޑު އަލުން ފެނިގެންދާ "ބަންޓީ އޯރް ބަބްލީ 2" އަންނަ ނޮވެމްބަރު މަހު 19 ގައި ސިނަމާތަކުގައި އަޅުވާނެ އެވެ.