ނ. ލަންދޫ މަގުހެދުމުގެ މަޝްރޫއުގެ ބޮޑުބައެއް ނިމިއްޖެ ކަމަށް އެ މަސައްކަތާ ހަވާލުވެފައިވާ މޯލްޑިވްސް ޓްރާންސްޕޯޓް އެންޑް ކޮންޓްރެކްޓިން ކޮމްޕެނީ (އެމްޓީސީސީން) ބުނެފި އެވެ.

އެމްޓީސީސީން މިއަދު ބުނީ ލަންދޫ މަގުހެދުމުގެ މަޝްރޫއުގެ 70 ޕަސެންޓް މަސައްކަތް ނިމިފައިވާ ކަމަށެވެ. އަދި މި މަޝްރޫއުގެ ދަށުން ހާބާ ޕޭވްމަންޓު ހެދުމުގެ މަސައްކަތް މިހާރު ނިމިފައިވާ ކަމަށް އެ ކުންފުނިން ބުންޏެވެ.

މި މަޝްރޫއުގެ ދަށުން އެސަރަހައްދުގައި ޕޭވްމަންޓު ހެދުމުގެ މަސައްކަތް ވެސް މިހާރު ވަނީ ފަށާފައި ކަމަށް އެ ކުންފުނިން ވަނީ ބުނެފަ އެވެ.

މިގޮތުން މި މަޝްރޫގެ ދަށުން ބޮޑު ހިލަ ބޭނުންކޮށްގެން 401 މީޓަރު ބޭރު ތޮށި ހެދުމާއި، 256 މީޓަރު އެއްގަމު ތޮށި ހެދުމާއި، 13 މޫރިން ބްލޮކްލުން ހިމެނެ އެވެ. އަދި 13 ބަނދަރު ބައްތި ހަރުކުރުމާއި، ދެ ނެރުބައްތި ހަރުކުރުމާއި، 1،280 ސްކެއާ މީޓަރުގައި ޕޭވްމަންޓެއް ހެދުމުގެ އިތުރުން، 23000 ކިއުބިކް މީޓަރަށް ބަނދަރު ފުންކުރުމާއި، 2000 ކިއުބިކް މީޓަރު ނެރުފުން ކުރުމާއި، 60 މީޓަރުގެ ރިވެޓްމަންޓް ޖެހުމާއި އަދި 65 މީޓަރުގެ ގުރޯއިން ޖެހުން ވެސް ހިމެނެ އެވެ.

މިނިސްޓްރީ އޮފް ނޭޝަނަލް ޕްލޭނިން އެންޑް އިންފްރާސްޓްރަކްޗާ އިން އެމްޓީސީސީ އާއި ހަވާލުކޮށްގަން ކުރިއަށް ގެންދާ މި މަޝްރޫއުއަކީ 35,603,963.70 ރުފިޔާއަށް ކުރިއަށްގެންދާ މަޝްރޫއުއެކެވެ. އަދި މިއީ 420 ދުވަހުގެ ތެރޭގައި ނިންމުމަށް ހަވާލުކޮށްފައިވާ މަޝްރޫއެކެވެ.