ހިޔާ ފެލްޓުތަކުގެ ފިނިޝިންގެ މަސައްކަތް ނުނިމި ލަސްވާ ސަބަބު ބެލުމަށް ހައުސިން ޑިވެލޮޕްމަންޓް ކޯޕަރޭޝަން (އެޗްޑީސީ) އިން ސާވޭއެއް ފަށައިފި އެވެ.

ފްލެޓުތަކުގެ މަސައްކަތް ލަސްވާ ސަބަބު ދެނެގަތުމަށް އެޗްޑީސީން ދަނީ ހިޔާ ފްލެޓުތަކުގައި ދިރިއުޅޭ މީހުންނަށް މެސެޖެއް މެދުވެރިކޮށް ލިންކެއް ފޮނުވަމުންނެވެ. އެޗްޑީސީން މި ސާވޭ ފަށާފައި ވަނީ މިމަހުގެ 16 ވަނަ ދުވަހުގެ އެވެ.

އޭގެ އިތުރުން މި ސާވޭ، ގްރޭސް ޕީރިއަށް އިތުރުކުރުމާއި މެދު ގޮތެއް ނިންމުމަށްވެސް ބޭނުންކުރާނެ ކަމަށް އެޗްޑީސީން ވަނީ ބުނެފަ އެވެ.

ގިނަ އަދަދެއްގެ ބަޔަކަށް ބޯހިޔާވަހިކަން ފޯރުކޮށްދިނުމަށް ކުރީގެ ސަރުކާރުން ހިންގާފައިވާ މި މަޝްރޫއުގެ ދަށުން އަޅާފައިވާ ހިޔާ ފްލެޓުތަކުގައި ފިނިޝިންގެ މަސައްކަތް ނުނިންމަ އެތައް ބަޔަކު ދިރިއުޅެމުން ގެންދެ އެވެ. އަދި ފިނިޝިންގެ މަސައްކަތް ނުނިމެނީސް، ކުލި ދައްކަން ޖެހުންވަނީ ފްލެޓުތަކުގައި ދިރިއުޅޭ ގިނަ ބައެއްގެ ކަންބޮޑުވުމަކަށެވެ.

ނަމަވެސް އެޗްޑީސީން ވަނީ އެ މަސައްކަތަށް، ދީފައިވާ ގްރޭސް ޕީރިއަޑްގެ ތެރޭގައި ނުނިމިއްޖެ ނަމަ، އެ މުއްދަތު އިތުރުކުރުމަށް ސަރުކާރާ މަޝްވަރާކުރާނެ ކަމަށް ބުނެފަ އެވެ.

ހިޔާ ފްލެޓްގެ ފިނިޝިންގެ މަސައްކަތްތައް ނިންމުމަށް ދީފައިވާ މުއްދަތު މިމަހުގެ ނިޔަލަށް ހަމަވާތީ، އިތުރުކުރުމަށް ސަރުކަރާއެކު މަޝްވަރާ ކުރަމުންދާ ކަމަށް އެޗްޑީސީން ބުނެފައިވާއިރު، ހިޔާ ފްލެޓްތަކުގެ ފިނިޝިންގެ މަސައްކަތް ނިންމައި، ކުލި ނެގުމަށް ކުރިން ހަމަޖެއްސީ އޮކްޓޯބަރު މަހުން ފެށިގެންނެވެ.

ނަމަވެސް އެ މުއްދަތަށް ވެސް ފިނިޝިންގެ މަސައްކަތް ނުނިމުމުން މިއަހަރުގެ ނިޔަލަށް ހިޔާ ފްލެޓްތަކުގެ ފިނިޝިންގެ މަސައްކަތް ނިންމުމަށް ރައީސުލްޖުމްހޫރިއްޔާ ވަނީ އިތުރު މުއްދަތެއް ދެއްވާފަ އެވެ.