މޮސްކޯ (27 ޑިސެމްބަރު) - ރަޝިއާއާއި ޔޫކްރެއިން ގުޅޭ ބޯޑަރު ސަރަހައްދުގައި ރަޝިއާގެ އަސްކަރިއްޔާއިން މިލިޓަރީ ޑްރިލް ހަރަކާތްތަކެއް ބާއްވައިފި އެވެ.

ރަޝިއާއިން މި ހަރަކާތްތައް ބާއްވާފައި މިވަނީ ރަޝިއާއާއި ޔޫކްރެއިންގެ ޑިޕްލޮމެޓިކް ގުޅުންތައް ހީނަރުވެ ރަޝިއާއިން ޔޫކްރެއިންއަށް ހަމަލާއެއް ދީފާނެ ކަމަށް ބެލެވިފައިވާ ދަނޑިވަޅެއްގަ އެވެ.

އަސްކަރިއްޔާއިން ބޭއްވި މި ހަރަކާތްތަކަކީ ދުޝްމަނެއްގެ ފަރާތުން ކުރިމަތިވެދާނެ ހަމަލާއަކަށް ތައްޔާރުވެ ތިބުމަށް ފަރިތަކުރުމުގެ ގޮތުން ބޭއްވި ހަރަކާތްތަކެއް ކަމަށް ހޯމަ ދުވަހު އަސްކަރިއްޔާއިން ބުނެފައިވެ އެވެ.

ރަޝިއާއިން ވަނީ ނޭޓޯގެ މެމްބަރުކަން ޔޫކްރެއިން އަށާއި އެހެން އެއްވެސް އަވަށްޓެރި ގައުމަކަށް ދިނުމަށް ދެކޮޅު ހަދައި އެ ދެ ގައުމު ގުޅޭ ބޯޑަރު ކައިރީގައި ހާހަކަށް ވުރެ ގިނަ ސިފައިން ބައިތިއްބާ އަސްކަރީ ހަރަކާތްތައް ވަރުގަދަ ކޮށްފަ އެވެ.

މީގެ ތެރެއިން ބައެއް ސިފައިންނަކީ ދާއިމީކޮށް އެ ސަރަހައްދުގައި ތިބޭނެ ބައެއް ކަމަށް ރަޝިއާގެ މީޑިއާ ރިޕޯޓުތައް ބުނެ އެވެ.

ރަޝިއާގެ މި އަމަލުތަކަކުގެ ސަބަބުން އެމެރިކާއާއި އެހެން ހުޅަނގުގެ ބާރުތަކުން ވަނީ އެގައުމާ މެދު ދަތި ކުރުމުގެ ފިޔަވަޅުތައް އަޅާނެ ކަމުގެ އިންޒާރު ދީފަ އެވެ.