މޯލްޑިވިއަން ޑިމޮކްރެޓިކް ޕާޓީ (އެމްޑީޕީ)ގެ ޗެއަރޕާސަންގެ މަގާމަށް ވާދަކުރަން ނިންމެވި އެސްޓީއޯގެ މެނޭޖިން ޑިރެކްޓަރު ހުސެއިން އަމްރުގެ ނަން އަނބުރާ ގެނެސް، މާފަންނު އުތުރު ދާއިރާގެ މެންބަރު އިމްތިޔާޒް ފަހުމީ (އިންތި) ވާދަކުރައްވަން ނިންމަވައިފި އެވެ.

އެމްޑީޕީގެ ވާދަވެރި އިންތިޚާބުގައި ވާދަކުރައްވާނެކަން އެ ޕާޓީގެ ތަރުޖަމާނުކަން ކުރައްވާ އިންތި ވަނީ ޓުވިޓާގައި އިއުލާންކުރައްވާފަ އެވެ.

އެމްޑީޕީގެ ޗެއާޕާސަންގެ މަގާމަށް ވާދަކުރައްވަން ނިންމެވިކަން ހާމަކުރެއްވި ނަމަވެސް އިތުރު އެއްޗެއް އޭނާ ވިދާޅެއް ނުވެ އެވެ.

އަންނަ އޭޕްރީލް 16ގައި ބޭއްވުމަށް އިއުލާންކޮށްފައިވާ އެމްޑީޕީގެ ޗެއާޕާސަންގެ އިންތިޚާބަށް ކުރިމަތިލުމުގެ ފުރުސަތު މިމަހުގެ 19 އާ ހަމައަށް ވަނީ ހުޅުވާލާފަ އެވެ. އަދި އެމްޑީޕީގެ ޗެއާޕާސަންގެ މަގާމަށް ވާދަކުރައްވާނެކަމަށް މިހާތަނަށް އިއުލާންކުރައްވާފައި އިންތިގެ އިތުރުން އިކޮނޮމިކް މިނިސްޓަރު ފައްޔާޒް އިސްމާއީލް އާއި އެސްޓީއޯގެ މެނޭޖިން ޑިރެކްޓަރު އަމްރު އެވެ. އެކަމަކު އަމްރުގެ ނަން އަނބުރާ ގެންދިއުމުން މިހާރު ވާދަކުރައްވާނީ ފައްޔާޒާއި އިންތި އެވެ.

އެމްޑީޕީގެ ޗެއާޕާސަންގެ އިންތިޚާބު މި ބާއްވަނީ އެ މަގާމުގައި ހުންނެވި ހެންވޭރު ހުޅަނގު ދާއިރާގެ މެންބަރު ހަސަން ލަތީފްގެ ދައުރު މިދިޔަ ހޮނިހިރު ދުވަހު ހަމަވުމުންނެވެ.