ވާދަވެރިކަން ބޮޑު އެމްޑީޕީގެ ޕީޖީ ގްރޫޕުގެ މަގާމުތަކުގެ އިންތިޚާބުގެ ވޯޓުލުން ފެށިއްޖެ އެވެ.

ޕީޖީ ގުރޫޕްގެ އިންތިހާބުގެ ވޯޓުލުން ކުރިއަށްދާނީ މިއަދު މެންދުރުފަހު 1:30 އިން ހަވީރު 5:30 އަށް އެމްޑީޕީގެ ހެޑް އޮފީހުގައި ކަމަށް އެމްޑީޕީން ހާމަކޮށްފައިވެ އެވެ.

މިފަހަރު ޕީޖީގެ މަގާމްތައް ދަނީ ވަރަށް ވާދަވެރިކޮށެވެ. އެގޮތުން ނިމުނު ދައުރުގެ ޕީޖީ ލީޑަރު އަލީ އާޒިމް މަގާމު ދިފާއު ކުރައްވަން ނިކުންނަވާއިރު މަޖިލީހުގެ ރައީސް ކަމަށް ކުރިމަތިލެއްވި މުހައްމަދު އަސްލަމްވެސް ޕީޖީ ލީޑަރު ކަމަށް ކުރިމަތިލައްވަ އެވެ. މިދެބޭފުޅުންގެ ދެމެދުގައި ކެމްޕެއިންގެ ފޯރިވެސްވަނީ ވަރަށް ގަދަވެފަ އެވެ.

ޕީޖީގެ ޑެޕިއުޓީ ލީޑަރުކަމަށް ހުސެއިން ޝަހީމް (އަނދުން ހުސެއިން)، މުހައްމަދު ރަޝީދު ހުސެއިން (ބިގޭ) އަދި އިލްޔާސް ލަބީބު ވާދަކުރައްވަ އެވެ.

ޕީޖީގެ މަގާމުތަކުގެ އިންތިހާބު ކުރިއަށްދާއިރު ޕީޖީ ލީޑަރު ކަމަށް ކުރިމަތިލާފައިވާ ދެ ބޭފުޅުންނަކީ ދެ ފެކްޝަންގެ ދެބޭފުޅުންނެވެ. އެގޮތުން އަލީ އާޒިމް އަކީ ރައީސް ނަޝީދުގެ ފެކްޝަނުން ކުރިމަތިލައްވާ ކެންޑިޑޭޓަށްވާއިރު އަސްލަމް ކުރިމަތި ލައްވަނީ ރައީސް ސާލިހުގެ ފެކްޝަނުންނެވެ.