އެމްޑީޕީގެ ޗެއާޕާސަންގެ އިންތިހާބުގެ ފޯރި އިތުރުވެފައި ވަނިކޮށް ރައީސް މުހައްމަދު ނަޝީދުގެ ލޯޔަރު މެމްބަރު ހިސާން ހުސެއިން ވެސް އިކޮނޮމިކް މިނިސްޓަރު ފައްޔާޒް އިސްމާއީލްގެ ކެމްޕެއިނާ ގުޅިވަޑައިގެންފި އެވެ.

މިނިސްޓަރު ފައްޔާޒްގެ ކެމްޕެއިން ބ އަތޮޅުގައި ފައްޓަވާފައިވާއިރު، އިއްޔެ ތުޅާދޫއަށް ފައްޔާޒްއާއި ކެމްޕެއިން ޓީމު ތުޅާދުއަށް ވަޑައިގަތުމުން އެރަށުގެ އެމްޑީޕީގެ ސަޕޯޓަރުންނާއެކު ހިސާން ވަނީ ފައްޔާޒަށް ހޫނު މަރުހަބާއެއް ދަންނަވައިފަ އެވެ. ހިސާންއާއެކު ފިރިކަލުން އިބްރާހިމް ނާޒިލް ވެސް ބައިވެރިވެވަޑައިގެންނެވި އެވެ.

ހިސާންއަކީ ރައީސް ނަޝީދުގެ ލޯޔަރުގެ ގޮތުގައި މަސައްކަތްކުރައްވާފައިވާ ބޭފުޅެކެވެ. އަދި ހިސާން ވާދަކުރެއްވި މަޖިލިސް އިންތިހާބުގައި ރައީސް ނަޝީދު ވަނީ ހިސާންގެ ކެމްޕެއިންގައި ވެސް އަމަލީ ގޮތުން ބައިވެރިވެވަޑައިގެންފަ އެވެ.

ހިސާންގެ ކެޕްމެއިންގައި ރައީސް ނަޝީދާ އެކު

ރަށްރަށަށް ވަޑައިގެން "ހިންގާލަން" މިނަމުގައި ފައްޔާޒު ކެމްޕޭން ކުރައްވަމުންދާއިރު އޭނާ ގެންދަވަނީ އެމްޑީޕީގެ މެމްބަރުންނަށް ގިނަ ވައުދުތަކެއް ވެސް ވަމުންނެވެ. އެގޮތުން ޕާޓީ އަލުން ވަރުގަދައަށް ހިންގާލުމަށްޓަކައި ޕާޓީއަށް ލިބޭ ފައިސާގެ ބޮޑު ބައެއް ދާއިރާތަކުގެ އޮފީސްތައް ހިންގުމަށް ހަރަދުކުރަން ޖެހޭ ކަމަށް ފައްޔާޒު ވިދާޅުވި އެވެ.

އެމްޑީޕީގެ ދާއިރާތަކުގެ އޮފީސްތައް ހިންގަން ފައިސާ ދޫކުރަން އެމްޑީޕީގެ ގައުމީ މަޖިލީހުން ފާސްކޮށްފައިވީ ނަމަވެސް މިއަދާ ހަމައަށް ވެސް އެ އެންގުމަށް އަދި އަމަލުކޮށްފައެއް ނުވެ އެވެ. ޕާޓީގެ ހިންގުން ދޯދިޔާވެ، ރަށްރަށުގެ ހަރަކާތްތައް ހުއްޓިފައިވާތީ އެ ޕާޓީގެ މިހާރުގެ ލީޑަޝިޕަށް އާއްމު މެމްބަރުންގެ ގިނަ ބަޔަކު ނުރުހުންފާޅު ކުރެ އެވެ.

އެމްޑީޕީގެ ޗެއާޕާސަން ކަމަށް ފައްޔާޒުއާ ވާދަކުރައްވާ އިމްތިޔާޒު ފަހްމީ ވެސް ވަނީ އޭނާއަށް މަގާމު ލިބިވަޑައިގެންފިނަމަ ބައެއް ކަންކަން ކުރައްވާނެ ކަމަށް ވިދާޅުވެފަ އެވެ. އަދި އެމްޑީޕީ، އެ ޕާޓީގެ އަސްލު ގޮތުގައި ހިންގަވާނެ ކަމަށް ވެސް އިމްތިޔާޒު ވިދާޅުވެފައިވެ އެވެ.

މިނިސްޓަރު ފައްޔާޒު ވަނީ މިހާތަނަށް މީހުން ދިރިއުޅޭ 80 ރަށަށް ދަތުރުކުރައްވައިފަ އެވެ.