ފަތުރުވެރިކަމުގެ ދާއިރާއިން އަދަޔާ ހިލާފު ކުރިއެރުންތަކެއް ހާސިލްކޮށްފައިވާ ފަރާތްތަކަށް ހާއްސަ އިނާމު އެރުވިދާނެ ގޮތްތަކެއް ކަނޑައެޅުއްވުމަށް އިސްކަންދެއްވުމަށް ރައީސް އިބްރާހިމް މުހައްމަދު ސޯލިހު އެދިވަޑައިގެންފި އެވެ.

ރައީސް ސޯލިހު މިގޮތަށް އެދިވަޑައިގަތީ ހާއްސަ އިނާމާބެހޭ ކޮމިޓީގެ މުއްދަތު ހަމަވުމާ ގުޅިގެން، އެ ކޮމިޓީ އަލުން އެކުލަވާލައްވައި، އެ ކޮމިޓީއާ މިއަދު ބައްދަލުކުރައްވާ ދެއްކެވި ވާހަކަފުޅުގަ އެވެ.

ރައީސް އޮފީހުގައި ބޭއްވި މިބައްދަލުކުރެއްވުމުގައި ރައީސް ސޯލިހު ވިދާޅުވީ މި އަހަރަކީ ރާއްޖޭގެ ފަތުރުވެރިކަމަށް 50 އަހަރު ފުރުން ފާހަގަކުރާ އަހަރު ކަމަށްވާތީ، ފަތުރުވެރިކަމުގެ ދާއިރާ ކުރިއެރުވުމަށް މަސައްކަތް ކުރި ބޭފުޅުންގެ އަގުވަޒަން ކުރަންޖެހޭ ކަމަށެވެ. އެގޮތުން މިއަހަރު ހާއްސަ އިނާމު އެދާއިރާއިން އާދަޔާ ހިލާފު ކުރިއެރުންތަކެއް ހޯދާފައިވާ ފަރާތްތަކަށް އިނާމު ދިނުމަށް ގޮތްތަކެއް ކަނޑައެޅުވުމަށް ރައީސް ސޯލިހު އެދިވަޑައިގެންނެވިއެވެ.

އަދި ހާއްސަ އިނާމު ދެއްވުމުގައި މިހާތަނަށް ޢަމަލުކުރައްވަމުން ގެންދެވި އުސޫލުތަކާ ބެހޭގޮތުން އިތުރަށް ކޮމިޓީގައި މަސްވަރާ ކުރައްވައި، ގެންނަވަންޖެހޭ އިތުރު ބަދަލުތައް ގެންނެވުމަށް އެދިވަޑައިގެންނެވި އެވެ.

މި ބައްދަލުކުރެއްވުމުގައި، ޚާއްޞަ އިނާމާބެހޭ ކޮމިޓީގެ ޗެއާޕާސަން ޑރ. އިބްރާހީމް ޒަކަރިއްޔާ މޫސާ ދެއްކެވި ވާހަކަފުޅުގައި، ކޮމިޓީއަށް ރައީސް ދެއްވި އިތުބާރާއި ޔަގީންކަން އެގޮތުގައި ދަމަހައްޓަވާނެ ކަމުގެ ޔަގީންކަން ދެއްވި އެވެ. އަދި ރައީސް ދެއްވި އިރުޝާދާ އެއްގޮތަށް މަސައްކަތްތައް ކުރައްވަމުން ގެންދަވާނެ ކަމުގައި ވެސް ވިދާޅުވި އެވެ.

ހާއްސަ އިނާމާބެހޭ ކޮމިޓީ އަލުން އެކުލަވާލެއްވިއިރު، ކުރިން ކޮމިޓީގައި ހިމެނިވަޑައިގެންނެވި ފަސް ބޭފުޅަކު ކޮމިޓީގައި ވަނީ ހިމަނުއްވާފަ އެވެ. ކޮމިޓީގެ ޗެއާޕާސަނަކަށް ހަމަޖެއްސެވީ، ޑރ. އިބްރާހީމް ޒަކަރިއްޔާ މޫސާ އެވެ. ކޮމިޓީގައި ދެން ހިމެނިވަޑައިގަންނަވާ ބޭފުޅުންނަކީ، ޑރ. އަބްދުލް އަޒީޒް ޔޫސުފާއި، ޑރ. އަހުމަދު އަލިމަނިކާއި، އައިޝަތު ޝާހީނާއި، މަރްޔަމް ޝިފްޒާނެވެ. ކޮމިޓީއަށް އަލަށް ޢައްޔަން ކުރެއްވި ދެ ބޭފުޅުންނަކީ، ޑރ. އަބްދުލް މުހުސިން މުހައްމަދާއި، އައިޝަތު ސަމާހުވެ.

ޚާއްޞަ އިނާމަކީ، ޢިލްމާއި، ހުނަރާއި، އުފެއްދުންތެރިކަމުގެ ގޮތުން ހިތްވަރާއެކު ހޯދާ ކާމިޔާބީތަކަށް ގައުމީ ފެންވަރުގައި ރައީސް ދެއްވާ އިނާމެކެވެ.

މި އިނާމު ދެއްވުމުގެ މަގްސަދަކީ، ރާއްޖެއަށް ރީތިނަން ހޯދައިދޭ ފަރާތްތަކުގެ ކާމިޔާބީއާއި، ހުނަރާއި، މަސައްކަތްތެރިކަމާއި، އުފެއްދުންތެރިކަމާއި، ހިތްވަރާއެކު އިލްމީގޮތުން މަތީ ވަނަތަކާއި ސަރަފު ހާސިލުކުރާ ފަރާތްތަކުގެ ކާމިޔާބީ އިހްތިފާލުކޮށް، އެފަރާތްތަކުގެ އަގު ވަޒަންކޮށް، ހިތްވަރުދީ، ރާއްޖޭގެ ތަރައްޤީއަށް ބޭނުންވާ ދާއިރާތަކަށް ދިވެހިންގެ އުފެއްދުންތަކާއި މަސައްކަތްތެރިކަމާއި ހުނަރުވެރިކަން މިސްރާބު ކުރުމުވެ.