ބޮލީވުޑްގެ މަޝްހޫރު ތަރި، ޝިލްޕާ ޝެޓީގެ ހަޔާތް ބަނަކުރި ކަޅު ވިލާގަނޑުން ސަލާމަތްވެވިއްޖެ ކަމަށް އޭނާ ބުނެފި އެވެ.

ބަރަހަނާ ފިލްމުތައް އުފައްދައި އޭގެ ވިޔަފާރިކުރުމުގެ ތުހުމަތުގައި ޝިލްޕާގެ ފިރިމީހާ ރާޖް ކުންދުރާ ހައްޔަރުކޮށްފައިވާއިރު، އެކަމާ ގުޅިގެން ޝިލްޕާއަށް ވެސް އާންމުންގެ ފަރާތުން ފާޑުކިޔުންތައް އަމާޒުވެފައިވެ އެވެ.

ރާޖް ހައްޔަރުކުރީ މިދިޔަ އަހަރުގެ ޖުލައި މަހުގަ އެވެ. ނަމަވެސް އޭނާގެ މައްޗަށް ކުރާ ތުހުމަތުތަކަށް ބާރު ދޭ ނުވަތަ ސާބިތު ކޮށްދޭ އެއްވެސް ހެެއްކެއް ނެތުމާ ގުޅިގެން ސެޕްޓެމްބަރު މަހު އޭނާ ވަނީ ބަންދުން ދޫކޮށްލާފަ އެވެ.

މި މައްސަލަ އެންމެ ހޫނުވި ދުވަސްވަރު ޝިލްޕާ ވަނީ އޭނާގެ ފިރިމީހާ އަމަލުކުރި ގޮތުގެ ސަބަބުން ފިރިމީހާ ދޫކޮށްލާނެ ކަމަށް ބުނެފަ އެވެ. އެހެން ނަމަވެސް ރާޖް މިނިވަންވެގެން އައުމާއެކު ޝިލްޕާގެ ވަނީ އޭނާގެ ފިރިމީހާއާއެކު އަލުން އައު ފެށުމަކުން އަނެއްކާ ވެސް ކުރިއަށް ގޮސްފަ އެވެ.

އެކަމާ ގުޅިގެން މީޑިއާތަކަށް މައުލޫމާތުދެމުން ޝިލްޕާ ބުނީ، ފާއިތުވި ދެ އަހަރަކީ އޭނާގެ ހަޔާތަށް ކުރިމަތިވި އެންމެ ހިތާމަވެރި ދުވަސްތައް ކަމަށެވެ. ނަމަވެސް އެ ހިތާމަވެރި ބަނަ ވިލާގަނޑުން ސަލާމަތްވުމަށް ކުރި މަސައްކަތް ކާމިޔާބުވެ، ކުރިމަގު އުޖާލާވަމުން އަންނަ ކަމަށް ޝިލްޕާ ބުނެފައިވެ އެވެ.