ތިލަމާލެ ބްރިޖް ހެދުމަށް ބޭނުންކުރާ ޕްލެޓްފޯމެއް ވިލިމާލެ ފަރަށް އެރުމުން އެތަނަށް ގެއްލުން ވެފައި ވޭތޯ އެންވަޔަރަމަންޓް ޕްރޮޓެކްޝަން އެޖެންސީ (އީޕީއޭ) އިން ބަލަން ފަށައިފި އެވެ.

ބުރިޖްގެ ޕްލެޓު ފޯމެއް ފަރަށް އަރައިފައިވަނީ އިއްޔެ މެންދުރުފަހު 2:45 ހާއިރު އެވެ. މިހާދިސާގައި ތިން މީހަކަށް އަނިޔާވެފައިވާއިރު އެމީހުންނަށް ވަނީ ވިލިމާލެ ހޮސްޕިޓަލުގައި ފަރުވާދީފަ އެވެ.

މިހާދިސާއާއި ގުޅިގެން އީޕީއޭއިން ބުނީ ބްރިޖް ޕްލެޓް ފޯމެއް ވިލިމާލެ ފަރަށް އެރުމުން ލިބުނު ގެއްލުން މިހާރު ބަލަމުން އަންނަ ކަމަށެވެ. އަދި ފަރަށް އެއްވެސް ގެއްލުމެއް ލިބިފައިވާނަމަ އެކަމާ ފިޔަވަޅު އަޅާނެ ކަމަށްވެސް އީޕީއޭއިން ބުންޏެވެ.

ބްރިޖުގެ މަސައްކަތް ކުރަމުން ދާއިރު، މާލެ/ ވިލިމާލެ ކަނޑުއޮޅިން ދަތުރުކުރުމަކީ މިހާރު ރައްކާތެރިކަމަށް ނުވާތީ ޓްރާންސްޕޯޓް މިނިސްޓްރީން ވަނީ އެ ސަރަހައްދުން އާންމު އުޅަނދުފަހަރު ދަތުރުކުރުން ވެސް މަނާކޮށްފަ އެވެ.

މާލެ، ވިލިމާލެ، ތިލަފުށި އަދި ގުޅީފަޅު ގުޅާލައި އަޅާ ތިލަމާލެ ބުރިޖުގެ އަމަލީ މަސައްކަތް މިމަހުގެ ދެވަނަ ދުވަހު ވަނީ ފަށައިފަ އެވެ.

"ގްރޭޓާ މާލެ ކަނެކްޓިވިޓީ ޕްރޮޖެކްޓް"ގެ ދަށުން މާލެ، ވިލިމާލެ، ގުޅިފަޅު އަދި ތިލަފުށި ގުޅާލުމަށް އަޅާ ބުރިޖުގެ މަސައްކަތްްކުރަމުން އަންނަނީ އިންޑިއާގެ އެފްކޮންސް އިންނެވެ.