ބޮލީވުޑްގެ މަޝްހޫރު އެކްޓަރު ޝާހުރުކް ހާންގެ 57 ވަނަ އުފަން ދުވަސް ފާހަގަކުރަން ސަޕޯޓަރުން އޭނާގެ ގޭ ދޮށަށް އެއްވެއްޖެ އެވެ.

ބޮލީވުޑްގެ "ކިންގް"ގެ ލަގަބު ހޯދާފައިވާ ޝާހްރުކުގެ އުފަން ދުވަސް ފާހަގަ ކުރުމުގެ ގޮތުން ގިނަ އަދަދެއް ސަޕޯޓަރުން ވަނީ އޭނާގެ ގޭ ދޮށަށް ޖަމާވެފަ އެވެ. ޝާހް ވަނީ ސަޕޯޓަރުންނަށް ފެނިލުމަށް ބެލްކަންޏަށް ނިކުމެފަ އެވެ.

ޝާހުގެ އެތައް ސަތޭކަ ފޭނުންނެއް އެއްވެ، އޭނާގެ ނަމުން ގޮވަމުން ދިޔައިރު އެ މަންޒަރު ބަލަން ޝާހު ހުރީ ވަރަށް އުފަލުންނެވެ.

ޝާހު ދިރިއުޅޭ ގޭ ދޮށުގައި ފޭނުންގެ ވެހިކަލްތަކާއި އެއްޗެހި ޕާކުކުރުމުގެ ސަބަބުން މުޅި މަގު ވެސް އޮތީ ބްލޮކްވެފަ އެވެ.

ޝާހުގެ އުފަން ދުވަސް ފާހަގަކުރުމަށް ފޭނުން އެއްވިއިރު، އެ ސަރަހައްދުގެ ސެކިއުރިޓީ ބެލެހެއްޓުމަށް ގިނަ އަދަދެއްގެ ސިފައިންނާ ފުލުހުން ވެސް ހަރަކާތްތެރިވި އެވެ.

2018 ވަނަ އަހަރު ރިލީޒްކުރި "ޒީރޯ"އަށް ފަހު ޝާހްރުކްގެ ފިލްމެއް ބެލުންތެރިންނަށް ފެނިފައިނުވާއިރު މިއަހަރު އަންނަނީ ތިން ފިލްމެއްގެ މަސައްކަތް ކުރަމުންނެވެ.

އެގޮތުން ޝާހްރުކްގެ އެންމެ އަވަހަށް ފެނިގެންދާނީ "ޕަތާން" އިންނެވެ. މިހާރު މިފިލްމުގެ ޓީޒާ ބެލުންތެރިންނަށް ދޫކޮށްލާފައިވާއިރު މި ފިލްމު ރިލީޒް ކުރުމަށް ނިންމާފައިވަނީ އަންނަ އަހަރުގެ ޖެނުއަރީ މަހު އެވެ.

"ޕަތާން"ގެ އިތުރުން ޝާހްރުކް ފެނިގެންދާނެ އިތުރު ދެ ފިލްމަކީ "ޖަވާން" އާއި "ދުންކީ" އެވެ.

ޝާހްރުކްގެ "ދުންކީ"ގެ ބައެއް މަންޒަރުތައް ނެގުމަށް ސައުދީ އަރަބިއްޔާއަށް ފުރުމަށް އަންނަނީ ތައްޔާރުވަމުންނެވެ.

ޝޫޓު ކުރުމަށް ހަމަޖެހިފައިވަނީ ސައުދީގެ ޖިއްދާގައެވެ.