ފިލްމީ ދާއިރާއިން ކުރިއަށް އަރައިގެން ހިނގައިދާނެތީ ބަޔަކު ބަޔަކު އެކަމަށް ހުރަސް އެޅި ކަމަށާއި ފިލްމުތަކުން ލިބެމުން ދިޔަ ފުރުސަތުތައް ގެއްލުވާލަން ވެސް މަސައްކަތް ކޮށްފައިވާ ކަމަށް މަޝްހޫރު ބަތަލާ ޕްރިޔަންކާ ޗޯޕްޅާ ބުނެފި އެވެ.

މޮޑެލް ރަންވީރު އަހްލުވާލިއާގެ ޕޮޑްކާސްޓް ޝޯ އަށް ދިން އިންޓަވިއުއްގައި ބޮލީވުޑް އަދި ހޮލީވުޑްގައި ވެސް މަސައްކަތް ކުރަމުން އަންނަ ބަތަލާ ޕްރިޔަންކާ ބުނީ ފިލްމީ ކެރިއަރު ހަލާކުކުރަން އުޅުނު މީހުން އެންމެ ބޮޑަށް މަސައްކަތްކުރީ ލިބެމުން އައި ފުރުސަތުތަކަށް ހުރަސް އަޅަން ކަމަށެވެ. އެގޮތުން ފިލްމުތަކުން ފުރުސަތު ގެއްލުވާލުމަށާއި ކުރަމުން އައި މަސައްކަތްތައް ހުއްޓުވަން ވެސް އެފަދަ ބައެއް މީހުން މަސައްކަތްކޮށްފައިވާ ކަމަށް ޕްރިޔަންކާ ބުންޏެވެ.

"އެކަމަކު އެއިން އެއްވެސް ކަމަކުން އެ ބަޔަކަށް އަހަރެން ނުހުއްޓުވުނު. ވަރަށް ވަރަށް މާޔޫސްވި ދުވަސްތަކެއް. އެކަމަކު އަހަންނަކީ ކުރިމަތިވާ އެފަދަ އެފަދަ ކަންކަމާ ހެދި ހިތްވަރު އެލުވާލައި، ރޯން އިންނާނެ މީހެއް ނޫން،" 40 އަހަރުގެ ބަތަލާ ޕްރިޔަންކާ ބުންޏެވެ.

2000 ވަނަ އަހަރު މިސް ވޯލްޑްގެ ތާޖު ހާސިލުކޮށްފައިވާ ޕްރިޔަންކާ ބުނީ ބައެއް މީހުން އޭނައާ ދެކޮޅަށް މަސައްކަތްކޮށް، ކެރިއަރު ހަލާކު ކުރަން މަސައްކަތް އިރު، ހިތްވަރު ދިނީ އެންމެ ގާތުގައި ތިބި މީހުންނެވެ.

ދެހާސް އަށެއްގެ ފިލްމު "ފެޝަން" އިން ނެޝަނަލް އެވޯޑް ވެސް ހޯދާފައިވާ ކާމިޔާބު ބަތަލާ ބުނި ގޮތުގައި ކަންކަމާ ދޭތެރޭ އަބަދު ވެސް ދެކެނީ ވަރަށް ޕޮޒިޓިވްކޮށެވެ.

އެމީހަކު ބޭނުންވާ ކަމެއް ހާސިލުކުރެވޭނީ ވަރަށް ބުރަކޮށް މަސައްކަތް ކޮށްގެން ކަމަށާއި ބަޔަކު ކިޔާ ފާޑުތަކަށް ބެލުމެއް ނެތި ކުރިއަށް ގޮސްގެން ކަމަށް ވެސް އޭނާ ބުންޏެވެ.

ބޮލީވުޑަށް ވުރެ ބޮޑަށް މިހާރު ހޮލީވުޑަށް ވަގުތުދޭ ބަތަލާ އެ އިންޑަސްޓްރީ އަށް ނުކުތީ އޭބީސީގެ 2015 ގެ ސީރީޒް "ކްއަންޓިކޯ" އިންނެވެ. ޕްރިޔަންކާގެ ފުރަތަމަ ހޮލީވުޑް ފިލްމަކީ 2017 ގެ "ބޭވޮޗް" އެވެ.

ޕްރިޔަންކާގެ ކުރިއަށް ހޮލީވުޑްގެ ޕްރޮޖެކްޓްތަކުގެ ތެރޭގައި އެމެޒޯންގެ ވެބް ސީރީޒް "ސިޓަޑެލް" އާއި ފީޗާ ފިލްމުތައް ކަމަށްވާ "ލަވް އެގެއިން" އާއި "އެންޑިން ތިންގްސް" ހިމެނެ އެވެ. އޭނަ އެންމެ ފަހުން ފެނިފައި ވަނީ މިދިޔަ އަހަރުގެ ޑިސެމްބަރުގެ "މެޓްރިކްސް ރިސަރެކްޝަންސް" އެވެ.

ޕްރިޔަންކާގެ އެންމެ ފަހުގެ ހިންދީ ފިލްމަކީ 2019 ގެ "ދަ ސްކައި އިޒް ޕިންކް" އެވެ. މަސައްކަތް ފަށަން އޮތް ފިލްމަކީ "ޖީ ލޭ ޒަރާ" އެވެ.

މިހާރު އަންހެން ދަރިއަކު ވެސް އޮތް ބަތަލާގެ ފިރިމީހާ އަކީ އެމެރިކާގެ ލަވަކިޔުންތެރިޔާ/ އެކްޓަރު ނިކް ޖޯނަސް އެވެ.