ޖުޑީޝަލް ސާވިސް ކޮމިޝަން (ޖޭއެސްސީ)ން ކޮންމެ ފަރުދަކަށްވެސް ރަނގަޅު ފަނޑިޔާރެއްގެ ހައްގު ހޯދައިދޭން މަސައްކަތް ކުރާކަމަށް ޖޭއެސްސީގެ ރައީސް ހިސާން ހުސައިން ވިދާޅުވެއްޖެ އެވެ.

ޙިސާން މިހެން ވިދާޅުވީ، ރާއްޖޭގެ ޖުޑިޝަރީ ހިނގަމުންދާ ގޮތް ޒުވާނުންނަށް ތަޖުރިބާކުރެވޭ ގޮތަށް ފަރުމާކޮށްފައިވާ "ޖުޑިޝަރީ ފޮ ޖޫނިއާސް" ވޯކްޝޮޕް ފެށުމުގެ ރަސްމިއްޔާތުގައި ވާހަކަދައްކަވަމުންނެވެ.

ހިސާން ވިދާޅުވީ ޖޭއެސްސީ އިން ކުރަނީ ބުރަ އަދި އުނދަގޫ މަސައްކަތެއް ކަމަށާއި، ދަތިތަކުގެ ތެރެއިން ވެސް އެ މަސައްކަތްކުރަނީ ކޯޓުތަކުގެ ކުރިމަތީގައި ހުއްޓޭ ކޮންމެ މީހަކީ ވެސް އިންސާފުވެރި އަދި އަދުލުވެރި ފަނޑިޔާރެއް ހައްގުވާ ފަރާތަކަށްވާތީ ކަމުގަ އެވެ.

ހިސާން ވިދާޅުވީ، ކޯޓުތަކޭ ބުނުމުން ކޮންމެ މީހަކަށް ވެސް ބަޔަކު ކުށެއް ކޮށް އެކަމުން ސަލާމަތް ނުވެގެން އުޅޭއުޅުން ސިފަވީ ނަމަވެސް، އެތަނަކި އަދުލު އިންސާފުގެ ތަނެއް ކަމަށެވެ. އެގޮތުން ނާއިންސާފުން ތިމާގެ ޙައްޤެއް ގެއްލިދާ ކޮންމެ ވަގުތަކީ ކޯޓުތަކުގެ ދޮރުގައި ޓަކި ޖަހަންޖެހޭ ވަގުތެއް ކަމަށާއި، މިފަދަ ކޮންމެ ހާލަތެއްގައި، އަދުލުވެރިކަމާއެކު އެ މައްސަލައެއް އިންސާފުގެ މަގުން ނިންމަދޭނެ ފަނޑިޔާރުން ތިބިކަން ޔަޤީންވުމަކީ ކޮންމެ މީހަކުވެސް އެދޭނެ ގޮތް ކަން ހިސާން ފާހަގަކުރެއްވި އެވެ.

ހިސާން މިމޭރުމުން ވާހަކަދައްކާފައިވާއިރު، ޖޭއެސްސީއަށް ސަރުކާރުން ސިޔާސީ ނުފޫޒު ފޯރުވާކަމަށް އިދިކޮޅުން ތުހުމަތު ކުރެ އެވެ. ޖޭއެސްސީގެ ކޮމްޕޮސިޝަން ބަދަލު ކުރުމަކީވެސް ރައީސް ސޯލިހުގެ ވައުދެކެވެ. ނަމަވެސް އެވައުދު އަދި ފުއްދާފައެއް ނުވެ އެވެ. ޖޭއެސްސީ އެކުލެވިގެންވާ ގޮތް ބަދަލުކުރަން އިދިކޮޅުން މަހިބަދޫ ދާއިރާގެ މެމްބަރު އަހްމަދު ތޯރިގު ދެފަހަރެއްގެ މަތިން ބިލު ހުށައެޅުމުންވެސް އެމްޑީޕީންވަނީ މަޖިލީހުން ބިލު ބޭރުކޮށްލާފަ އެވެ.

ޖޭ.އެސް.ސީގެ ރައީސް ވިދާޅުވީ، އެ ހައްގު ކޮންމެ މީހަކަށް ވެސް ކަށަވަރުކޮށްދިނުމަށްޓަކާ އެކޮމިޝަނުން ކުރަނީ ބުރަ އަދި ބޮޑު މަސައްކަތެއް ކަމަށެވެ. އަދި އެއީ ދަތި އުނދަގޫތަކުގެ ތެރެއިން ގިނަ ގޮންޖެހުންތަކަކާ ކުރިމަތިލާން ޖެހޭ މަސައްކަތެއް ކަމަށެވެ. އެކަމަކު އެކަން ކުރަނީ ކޮންމެ މީހަކަށް ވެސް އިންސާފުވެރި ފަނޑިޔާރަކު ލިބޭނެކަން ޔަގީންކޮށްދިނުމަށް ކަމަށް ހިސާން ވިދާޅުވި އެވެ.