ޕްރޮސެކިއުޓާ ޖެނެރަލް ހުސެން ޝަމީމް އޭނާގެ އަމިއްލަ ބްލޮގްގައި ޝާއިއުކުރެއްވި ލިޔުމެއްގައި ޒިނޭގެ ތެރޭގައި ގާނޫނީ ޒިނޭ އާއި ޝަރުއީ ޒިނޭ ހިމެނޭ ކަމަށް ލިޔުއްވާފައި ވާތީ އިސްލާމިކް މިނިސްޓްރީން އޭނާއަށް ރައްދު ދީފި އެވެ.

ޝަމީމްގެ ބްލޮގްރައި އޭނާ ލިޔުއްވާފައި ވަނީ ގާނޫނުލް އުގޫބާތުގައި "ޝަރުއީ ޒިނޭ" އާއި "ގާނޫނީ ޒިނޭ" އޮންނަ ކަމަށެވެ.

އިސްލާމިކް މިނިސްޓްރީން މިރޭ ކުރި ޓްވީޓެއްގައި ވަނީ އިސްލާމްދީނުގައި ބޭނުން ކުރަމުންދާ ޝަރުއީ މުޞްޠަލަޙުތައް (ލަފްޒުތައް) ބޭނުން ކުރަންވާނީ ޝަރުއުގައި އެ ލަފްޒުތައް އެ ބޭނުން ކުރަމުން އަންނަ ގޮތަށް ކަމަށެވެ.

"މިސާލަކަށް: ޒިނޭ ވާނީ ޒިނޭއަށެވެ. ކައިވެނި ވާނީ ކައިވެންޏަށެވެ. ލިވާޠު ވާނީ ލިވާޠަށެވެ." މިނިސްޓްރީގެ ޓްވީޓެއްގައި ލިޔެފައިވެ އެވެ.

އިސްލާމްދީނަކީ ރާއްޖޭގެ ގާނޫނުތަކުގެ މައިގަނޑު މަސްދަރު ކަމަށް ވެފައި، މިފަދަ ޝަރުއީ މުޞްޠަލަޙުތަކުގެ ޝަރުޢީ މަފްހޫމް ގެއްލޭނެ ފަދައިން ބޭނުންކުރުން ޝަރުއީ މިންގަނޑުތަކާއި ގާނޫނުއަސާސީއާ ޚިލާފު ވާނެ ކަމަށް ވެސް މިނިސްޓްރީން ބުންޏެވެ.

ޕީޖީ ޝަމީމް ބްލޮގްގައި ލިޔުއްވި އެ ލިޔުމާ ގުޅިގެން ގިނަ ބައެއްގެ ފާޑުކިޔުން އޭނާ އަށް ވަނީ އަމާޒުވެފަ އެވެ.