އިލެކްޝަންސް ކޮމިޝަން (އީސީ) މެމްބަރު އަލީ ނަޝާތުގެ ދައުރު މިއަދު ހަމަވެއްޖެ އެވެ.

ނަޝާތުގެ ދައުރު ހަމަވިއިރު މިއަހަރު ބާއްވާ ރިޔާސީ އިންތިހާބަށް އޮތީ 47 ދުވަހެވެ. މިއަހަރުގެ ރިޔާސީ އިންތިހާބު ބޭއްވުމަށް ހަމަޖެހިފައި ވަނީ ސެޕްޓެމްބަރު މަހުގެ 9 ވަނަ ދުވަހު އެވެ.

ނަޝަތުގެ ދައުރު މިއަދު ހަމަވިއިރު ނަޝާތު އިތުރު ދައުރަކަށް އައްޔަން ކޮށްދިނުމަށް އެދި ރައީސުލްޖުމްހޫރިއްޔާ އިބްރާހިމް މުހައްމަދު ސޯލިހް ރައްޔިތުންގެ މަޖިލީހަށް މެއި މަހުގެ 29 ވަނަ ދުވަހު ވަނީ ފޮނުއްވާފަ އެވެ.

ނަޝާތުގެ ދައުރު ހަމަވާތީ އިލެކްޝަންސް ކޮމިޝަނަށް މެންބަރަކު އައްޔަން ކުރަން ކުރި އިއުލާނަށް އިޖާބަދިން ފަރާތްތަކުގެ ނަންތައް ރައީސުލްޖުމްހޫރިއްޔާވަނީ އެދުވަހުު މަޖިލީހަށް ފޮނުއްވާފަ އެވެ.

އެނަންތަކުގެ ތެރެއިން ރައީސް ސޯލިހް އިސްކަން ދެއްވާ ނަމެއްގެ ގޮތުގައި އޮތީ ނަޝާތުގެ ނަމެވެ.

އިލެކްޝަންސް ކޮމިޝަންގެ މެންބަރު ކަމަށް އައްޔަން ކުރާނެ ބޭފުޅަކު ކަނޑައަޅާނީ މަޖިލީހުންނެވެ.

ނަޝާތު އިލެކްޝަންސް ކޮމިޝަންގެ މެންބަރު ކަމަށް އައްޔަން ކުރީ ކުރީގެ ރައީސް ޔާމީންގެ ވެރިކަމުގައި 2018 ވަނަ އަހަރުގެ ޖުލައި 25 ވަނަ ދުވަހު އެވެ. އިލެކްޝަންސް ކޮމިޝަންގެ މެންބަރު ކަމަށް އައްޔަން ކުރުމުގެ ކުރިން އޭނާ ހުންނެވީ އެކޮމިޝަންގެ ޑިރެކްޓަރެއްގެ މަގާމުގަ އެވެ.