އެމެރިކާގެ މަޝްހޫރު ލަވަކިޔުންތެރިޔާ ބިޔޯންސޭގެ ކޮންސެޓެއް ކުރިއަށް ދަނިކޮށް ބޯކޮށް ވާރޭ ވެހެން ފަށައި ކޮންސެޓް ބަލަން އައި ގިނަ ބަޔަކު އެތަނުގައި ތާށިވުމުން އެ މީހުންނަށް ގެއަށް ދެވޭނެ ގޮތް ބިޔޯންސޭ ހަމަޖައްސައިދީފި އެވެ.

އެގޮތުން ބިޔޯންސޭ ވަނީ ކޮންސެޓަށް އައި ވޮޝިންޓަން ޑީސީގައި ދިރިއުޅޭ މީހުން އަނބުރާ އެ ސަރަހައްދަށް ދިއުމަށް ދަތުރު ހަމަޖައްސައިދީ އެ ދަތުރުގެ ޚަރަދުތައް ވެސް ދީފަ އެވެ.

ބޯ ވާރޭގެ ސަބަބުން ކޮންސެޓުގައި ގަޑިއިރަކަށްވުރެ ގިނައިރު މީހުން ތާށިވެފައި ތިބިއިރު އާއްމު ދަތުރުފަތުރު ވެސް އޭރު ވަނީ ހުއްޓާލާފަ އެވެ.

އެހެން ނަތަވެސް ބިޔޯންސޭގެ ޓީމުން ވަނީ ވޮޝިންޓަން ޑީސީގެ މެޓްރޯ ސްޓޭޝަންތަކަށް ގުޅައި ހުރިހާ ސްޓޭޝަންއެއް އިތުރު އެއް ގަޑިއިރަށް ހުޅުވާފައި ހުންނަ ގޮތަށް ވެސް ހަމަޖައްސައިދީފަ އެވެ.

މި ހުރިހާ ކަމަކަށް ބިޔޯންސޭގެ ފަރާތުން ގާތްގަނޑަކަށް 100،000 އެމެރިކާ ޑޮލަރު ހަރަދުވި ކަމަށް އެމެރިކާގެ ނޫސް ރިޕޯޓުތައް ބުނެ އެވެ.

ބިޔޯންސޭގެ މި އަމަލަށް ގިނަ ބައެއްގެ ތައުރީފާއި ލޯބި ލިބެމުން އަންނައިރު އޭނާއަކީ ސަޕޯޓަރުންނަށް ކަމޭހިތާ މީހެއްކަން މިކަމުން ވެސް އެނގޭ ކަމަށް ގިނަ ބަޔަކު އަންނަނީ ބުނަމުންނެވެ.