ކުރީގެ ރައީސް އަބްދުﷲ ޔާމީން އަބްދުލްގައްޔޫމްގެ ޖަލަށްލި މައްސަލާގެ އިސްތިއުނާފް ޝަރީއަތުގެ ހުކުމް އިއްވުމުގެ މަޖިލިސް ލައިވްކޮށް ދައްކާނެ ކަމަށް ހައި ކޯޓުން ބުނެފި އެވެ.

ޔާމީން ފަސް އަހަރަށް ޖަލަށްލުމާ އެކު ފަސް މިލިއަން ޑޮލަރުން ޖޫރިމަނާ ކުރަން ކްރިމިނަލް ކޯޓުން ކުރި ހުކުމުގެ އިސްތިއުނާފް މައްސަލާގެ ހުކުމް މާދަމާ ހައި ކޯޓުން އިއްވާނެ އެވެ. ހައި ކޯޓުން ބުނީ މާދަމާ މެންދުރު ބާއްވާ ހުކުމް އިއްވުމުގެ މަޖިލިސް ލައިވް ދައްކަނީ ޔޫޓިއުބް މެދުވެރިކޮށް ކަމަށެވެ.

ޔާމީން ޖަލަށްލާން ކްރިމިނަލް ކޯޓުން ކުރި ހުކުމް ބާތިލް ކުރުމާ ހައި ކޯޓުން އެ މަޖިލީހުގައި ގޮތެއް ނިންމާނީ ތިން ފަނޑިޔާރުންގެ ބެންޗަކުންނެވެ. އެ މައްސަލަ ބައްލަވަނީ ފަނޑިޔާރު ހުސައިން މަޒީދާއި ފަނޑިޔާރު މުހައްމަދު ނިޔާޒް އަދި ފަނޑިޔާރު ހުސައިން ޝަހީދެވެ. ރައުޔު ތަފާތުވެއްޖެ ނަމަ، މައްސަލަ ނިންމޭނީ އަޣުލަބިއްޔަތު ލިބޭ ކޮޅަކަށެވެ.

ޔާމީންގެ މައްޗަށް މަނީ ލޯންޑްރިންގެ އިތުރު ދައުވާއަކާއި ރިޝްވަތުގެ ދައުވާއެއް ވެސް ދައުލަތުން ކުރެ އެވެ. އެ ޝަރީއަތް ކްރިމިނަލް ކޯޓުގައި މިހާރު ދަނީ ހިނގަމުންނެވެ.