ގިނަ ބަޔަކު އިންތިޒާރު ކުރަމުން އައި ޝާހްރުކް ޚާންގެ ފިލްމު "ޖަވާން" އިއްޔެ ސިނަމާތަކުގައި އަޅުވާފައިވާއިރު އެ ފިލްމުގެ ބައެއް ރިވިއުތައް އާއްމުވެއްޖެ އެވެ.

ޖަވާން މިހާތަނަށް ބެލި ބައެއް މީހުން ބުނާ ގޮތުގައި އެމީހުންނަށް ކަމުދިޔައީ ފިލްމުގެ ފުރަތަމަ ހާފް އެކަންޏެވެ. ފުރަތަމަ ހާފްއަކީ ބްލޮކްބަސްޓާއެއްގެ ގޮތުގައި ގިނަ ބަޔަކު ސިފަކުރިއިރު ދެވަނަ ހާފް އެހާ ކަމުނުދާ ކަމަށް އެ މީހުން ބުނެ އެވެ.

މި ބީދައިން ޝުއޫރު ފާޅުކޮށް ފިލްމު ބެލި މީހުން އަންނަނީ ސޯޝަލް މީޑިއާގައި ފިލްމާ ބެހޭ ގޮތުން އެމީހުންގެ ހިޔާލުތައް ފާޅު ކުރަމުންނެވެ.

އެގޮތުން ފިލްމް ކްރިޓިކްސް އިންވަނީ ޖަވާންގެ އެކްޓިންއާއި ޑައިރެކްޝަންގެ އިތުރުން ވީއެފްއެކްސްގެ މަސައްކަތްތަކަށް ތައުރީފްކޮށް ވާހަކަދައްކާފަ އެވެ.

ފިލްމުގެ ދެވަނަ ހާފު މާ ކަމުނުދާ ކަމަށް ބުނި ނަމަވެސް އެންމެ ފުރަތަމަ ދުވަހު ވެސް ޖަވާންއަށް ވަނީ ބޮޑު އާމްދަނީއެއް ލިބި ޝާހުގެ ބައެއް ރެކޯޑުތައް ވެސް މުގުރާލާފަ އެވެ.

އެއާއެކު ކުރިއަށް އޮތް ދުވަސްތަކުގައި މި ފިލްމުން މިއަހަރު ޖެނުއަރީ މަހު ނުކުތް ޝާހުގެ ފިލްމު ޕަތާންގެ އާމްދަނީ ފަހަނައަޅާނެ ކަމަށް ވެސް ބޮލީވުޑްގެ މާހިރުން ލަފާކުރެ އެވެ.

ޖަވާންގައި ޝާހުގެ އިތުރުން ދެން ފެނިގެންދާނީ ދެކުނު އަންހެން އެކްޓަރެއް ކަމަށްވާ ނަޔަންތަރާ އެވެ. މިއީ ނަޔަންތަރާގެ ފުރަތަމަ ބޮލީވުޑް ފިލްމެވެ. ފިލްމު ޑައިރެކްޓް ކޮށްފައިވަނީ އަތުލީ އެވެ.