ޝާހްރުކް ޚާންގެ އެންމެ ފަހުގެ ފިލްމު "ޖަވާން" ބޮކްސް އޮފީހުގައި ގިނަ ކާމިޔާބީތަކެއް ހޯދަމުން އަންނައިރު އެ ފިލްމުގެ ދެވަނަ ބައެއް އަތުވެދާނެ ކަމުގެ އިޝާރާތެއް އޭނާ ދީފި އެވެ.

ޖަވާންއާ ބެހޭ ގޮތުން އާއްމުންގެ މީހަކު ކޮށްފައިވާ ޓްވީޓަކަށް ޖަވާބު ދެމުން ޝާހްރުކް ބުނީ އޭނާއަކީ ވެސް ފިލްމުގެ އެހެން އެކްޓަރެއް ކަމަށްވާ ވިޖޭގެ ވަރަށް ބޮޑު ސަޕޯޓަރެއް ކަމަށާއި އެކުގައި އިތުރު ފިލްމެއް ހެދުމަށް ވިސާއަށް އިންތިޒާރު ކުރަމުން އަންނަ ކަމަށެވެ.

މި ޓްވީޓުގައި ޝާހްރުކް އިޝާރާތް ކޮށްފައިވަނީ ޖަވާންގެ ދެވަނަ ބައަށް ކަމަށާއި އެ ފިލްމު ޝޫޓް ކުރަން ހަމަޖެހިފައިވަނީ ބޭރު ގައުމެއްގައި ކަމަށް ރިޕޯޓުތައް އަންނަނީ ބުނަމުންނެވެ.

ޝާހްރުކްއާއި ވިޖޭގެ އިތުރުން ނަޔަންތުރާ ފެނިގެންދާ "ޖަވާން"އަށް ދެ ދުވަސް ތެރޭގައި އިންޑިއާގެ ބޮކްސް އޮފީހުން 200 ކްރޯޑް ލިބިފައިވާއިރު ކުރިއަށް އޮތް ދުވަސްތަކުގައި އެ ފިލްމުން ބޮކްސް އޮފީހުގެ އިތުރު ރެކޯޑުތައް މުގުރާލާނެ ކަމަށް ބެލެވެ އެވެ.

ޖަވާންއަކީ މިއަހަރު ނުކުތް ޝާހްރުކްގެ ދެވަނަ ފިލްމެވެ. މިދިޔަ ޖެނުއަރީ މަހު ނުކުތް ޕަތާންއަށް ވެސް ބޮޑު ކާމިޔާބީއެއް ލިބި އެންމެ ބޮޑު އާމްދަނީއެއް ލިބުނު ހިންދީ ފިލްމަކަށް އެ ފިލްމު ވަނީ ވެފަ އެވެ.