ޝާހްރުކް ޚާންގެ ކުރިއަށް އޮތް ފަސް ވަރަކަށް ފިލްމަށް ގަދައަޅާ މަސައްކަތް ކުރަން ހިތްވަރު ދިނީ އޭނާގެ ދޮށީ ދެ ދަރިން ކަމަށްވާ އާރްޔަން ޚާންއާއި ސުހާނާ ޚާން ކަމަށް ޝާހްރުކް ބުނެފި އެވެ.

"ޖަވާން" ފިލްމުގެ ކާމިޔާބީ ފާހަގަ ކުރުމުގެ ގޮތުން ބޭއްވި ހަފްލާއެއްގައި ވާހަކަ ދައްކަމުން ޝާހްރުކް ވަނީ އޭނާގެ އެންމެ ފަހުގެ ދެ ފިލްމުގެ ކާމިޔާބީ އޭނާގެ ދަރިންނަށް ހާއްސަ ކޮށްފަ އެވެ.

ޝާހްރުކް ބުނީ އާރްޔަންއާއި ސުހާނާ ކުޑައިރު އެ ދެކުދިންނަށް އޭނާގެ ކުރީގެ ކާމިޔާބީ ފެނިފައިވާ ކަމަށާއި އެހެން ކަމުން ތިންވަނަ ދަރިފުޅު އަބްރާމްއަށް ވެސް އެ ތަޖުރިބާ ހޯދައިދިނުމަށް އާރްޔަންއާއި ސުހާނާ ހިތްވަރު ދިން ކަމަށެވެ.

ޝާހްރުކް ޚާން އެންމެ ފަހުގެ ދެ ފިލްމު ކަމަށްވާ "ޕަތާން"އާއި "ޖަވާން" އަށްވެސް ބޮލީވުޑްގައި ބޮޑު އާމްދަނީއެއް ލިބިފައިވެ އެވެ. އެގޮތުން ޖަވާން އަންނަނީ ބޮކްސް އޮފީހުގެ ބައެއް ރެކޯޑުތައް ވެސް މުގުރަމުންނެވެ.

މި ކާމިޔާބީ އޭނާއަށް ލިބިފައިވަނީ ގިނަ ފިލްމުތަކެއް ފްލޮޕް ވެސް ވުމަށްފަހު އެވެ. އެގޮތުން ފަހަކަށް އައިސް ފްލޮޕްވި ޝާހުގެ ފިލްމުތަކުގެ ތެރޭގައި "ފޭން" އަދި "ޒީރޯ" ފަދަ ފިލްމުތައް ހިމެނެ އެވެ.

ޝާހްރުކްއާއި ގައުރީ ޚާންގެ ކައިވެންޏަށް ތިން ކުދިން ލިބިފައިވާއިރު އެންމެ ހަގު ދަރިފުޅު އަބްރާމް އުފަން ވެފައިވަނީ 2013 ވަނަ އަހަރު އެވެ.