"ދިރާގު ޕޭ" އިން އިންޓަނޭޝަނަލް އެއިޑް ކެމްޕެއިން (އައިއޭސީ) ގެ މޯލްޑިވްސް ޣައްޒާ ރިލީފް ފަންޑަށް ވޮލެޓެއް ހުޅުވައިފި އެވެ.

ދިރާގުން ވަނީ އެ ފަންޑަށް 100،000ރ. ދީ، އިތުރު މީހުންނަށް އެހީވުމުގެ ފުރުސަތު ހުޅުވާލައިފަ އެވެ.

ދިރާގުން ބުނި ގޮތުގައި ކިއު.އާރް ކޯޑް ސްކޭންކޮށްގެން އަދި ދިރާގުޕޭ އެޕްގެ މާޗަންޓް ކޯޑު 7266 ބޭނުންކޮށްގެން މި ފަންޑަށް ފަސޭހަކަމާ އެކު ފައިސާ ހަދިޔާ ކުރެވޭނެ އެވެ.

މި ވޮލެޓަށް ހަދިޔާކުރާ ހުރިހާ ފައިސާއެއް ވެސް ފަލަސްތީނުގައި އައިއޭސީއިން ކުރިއަށްގެންދާ އިންސާނީ އެހީގެ މަސައްކަތަށް ދޭނެ ކަމަށް ވެސް ދިރާގުން ބުނެ އެވެ.

މި މަހުގެ ހަތް ވަނަ ދުވަހުން ފެށިގެން އިސްރާއީލުން ދެމުން އަންނަ ހަމަލާތަކުގައި ފަލަސްތީނުގެ ޣައްޒާ އިން 2،400 އަށް ވުރެ ގިނަ މީހުން ޝަހީދުކޮށްލައި، 9،200 އަށް ވުރެ ގިނަ މީހުން ވަނީ ޒަހަމްކޮށްލައިފަ އެވެ.

ހަމާސްގެ ހަމަލާތަކުގައި އިސްރާއީލުން 1،400 އަށް ވުރެ ގިނަ މީހުން ވަނީ މަރާލައިފަ އެވެ. އޭގެ ތެރޭގައި 289 މީހުންނަކީ އިސްރާއީލްގެ ސިފައިންނެވެ. ހަމާސް އިން ވަނީ 130 އަށް ވުރެ ގިނަ އިސްރާއީލް ސިފައިން ރަހީންކޮށްގެން ޣައްޒާ އަށް ގެންގޮސްފަ އެވެ.

އިސްރާއިލުން ގައްޒާއަށް ދެމުން އަންނަ ވަރުގަދަ ހަމަލާތަކާއެކު އިސްރާއިލުގެ ސިފައިން މިހާރު ދަނީ ގައްޒާއަށް އެރުމަށް ތައްޔާރުވަމުންނެވެ. އިސްރާއިލުން މިހާރު ވަނީ ގައްޒާގެ އުތުރުގައި ތިބޭ މީހުން އެ ސަރަހައްދު ދޫކޮށް ދިއުމަށް ވެސް އަންގައިފަ އެވެ.