އަންނަ އޭޕްރީލް މަހު ބާއްވާ ރައްޔިތުންގެ މަޖިލީހުގެ އިންތިހާބުގައި ބޮޑު އަޣުލަބިއްޔަތެއް ޕީޕީއެމް/ޕީއެންސީން ހޯދަން މަސައްކަތް ކުރަންޖެހޭ ކަމަށް ކުރީގެ ރައީސް އަބްދުﷲ ޔާމީން މިރޭ ވިދާޅުވެއްޖެ އެވެ.

ޕީޕީއެމް އޮފީހުގައި ބޭއްވި ޖަގަހަ ޖަލްސާގައި ޔާމީން ވިދާޅުވީ ޕީޕީއެމް/ޕީއެންސީގެ އަޣުލަބިއްޔަތު މަޖިލިހަށް ބޭނުން ވަނީ އުނިކޮށް ހުރި ކަންކަމާއި އިސްލާހު ކުރަން ޖެހޭ ކަންކަން އިސްލާހު ކުރަން ކަމަށެވެ. އަދި 2013 އިން 2018 އަށް އުފެދުނު ޕީޕީއެމް ސަރުކާރުގައި މުޅިން ވެސް މަޖިލިހުން ފާސްކޮށްފައި ވަނީ ރައްޔިތުންނަށް ފައިދާވާ ގާނޫނުތައް ކަމަށް ޔާމީން ވިދާޅުވި އެވެ.

ޔާމީން ވިދާޅުވި ގޮތުގައި މި ސަރުކާރުން ވެރިކަމަށް އައިސް މަޖިލިހުގެ އަޣުލަބިއްޔަތު ހޯދައިގެން ފުރަތަމަ ކަމަކަށް ކުރި ކަމަކީ ރައީސުލްޖުމްހޫރިއްޔާ އާއި ފިނޭންސް މިނިސްޓަރު މާލިއްޔަތު "އަތަށް ކަހާލުމަށް" މާލިއްޔަތު ގާނޫނުގައި ފިނޭންސް މިނިސްޓަރަށް ހުރަސް އަޅާފައި ހުރި ކަންތައްތައް ސަސްޕެންޑް ކުރުން ކަމަށެވެ. އޭގެ ފަހުން، ދެން ފެނިގެން ދިޔައީ ފައިސާ ބަހާލާ އުސޫލެއް ކަމަށް ވިދާޅުވި އެވެ.

"ދެން ބޭނުން ގޮތަކަށް ބޮޑު ބަނޑޭރިގެއިން އެއް ވަތްގަނޑުން ފައިސާ ނަގާފައި ދޭ ގޮތަށް ހެދީ. އެއްވެސް މަޖިލިހުން އޯވަސީ ކުރަން ޖެހޭ ނޫނީ އެ ބޭފުޅުން އެކައުންޓަބަލް ވާން ޖެހޭ މާއްދާ އުވާލީމަ އެއްވެސް ގޮތަކަށް އެކަން ކުރަން (ނުޖެހުނު). ރާއްޖޭގެ ފައިސާ ދެ ފަހަރު ނޫނީ ތިން ފަހަރަށް ޗާޕްކޮށްގެން އެ ނެރުނީ." ޔާމީން ވިދާޅުވި އެވެ.

ޔާމީން ވިދާޅުވި ގޮތުގައި ދެން އުފެދިގެން އަންނާނީ އެ މަނިކުފާނުގެ ވެސް ސަރުކާރެކެވެ. އެއަށް ފަހު، ދެން މަސައްކަތް ކުރަންވީ ރައްޔިތުންގެ މަޖިލިހުގެ މެޖޯރިޓީ ޕީޕީއެމް/ޕީއެންސީން ހޯދަން ކަމަށް އެމަނިކުފާނު ވިދާޅުވި އެވެ. ބައެއް މިސާލުތައް ނަންގަވައި ޔާމީން ވިދާޅުވީ ޕީޕީއެމް/ޕީއެންސީގެ މެޖޯރިޓީ އޮންނަ މަޖިލިހެއްގައި މަސްވެރިންގެ ހައްގުގައި ހުށަހަޅާ ގަރާރެއް އެއްލާލިޔަ ނުދޭނެ ކަމަށެވެ.

އަދި އަންހެނުންގެ ހައްގުގައި އާއި ގައުމީ މައްސަލަތައް ހުށަހަޅައިފި ނަމަ، ޕީޕީއެމް/ޕީއެންސީ މެމްބަރުން އެ މައްސަލަތައް ބަލައިގަންނަން ކެރިވަޑައިގަންނަވާނެ ކަމަށް ވެސް ޔާމީން ވިދާޅުވި އެވެ.

"އަޅުގަނޑުމެން ސަރުކާރަށް ދަތިވި ނަމަވެސް އެއީ ރައްޔިތުން ގިނަ ބަޔަކަށް ފައިދާ ކުރާ ކަމަށްވާ ނަމަ، އެ ފާސް ވެސް ކުރާނަން. އަޅުގަނޑުމެން ނުތިބޭނެ އަޅުގަނޑުމެންގެ ތާރީހުގައި އެއްވެސް ބަޖެޓަކަށް ވޯޓު ނުދީ. އެކަމަކު އެމްޑީޕީގެ ތާރީހަކީ މިހާތަނަށް އިދިކޮޅުގައި ވެރިކަން ކުރަން އެހެން ބަޔަކު ތިބެއްޖެ ނަމަ، އެއްވެސް ބަޖެޓަކަށް ނޯންނާނެ ވޯޓު ދީފައެއް،" ޔާމީން ވިދާޅުވި އެވެ.

ރައީސް އިބްރާހިމް މުހައްމަދު ސޯލިހުގެ ވެރިކަމުގައި ރާއްޖެ ވަނީ 15 އަހަރު ފަހަތަށް ސޮއްސާލާފައި ކަމަށާއި މިއީ މިނިވަން ގައުމެކޭ މިއަދު ބުނެވެން ނެތް ކަމަށް އެމަނިކުފާނު ވިދާޅުވި އެވެ. ކުރިން ރާއްޖޭގެ ސިޔާސަދަތީ ބާރު ހިނގާ ސަރައްދެއް މިހާރު އަތުގައި ނެތްކަން އެބަ އެނގޭ ކަމަށް ޔާމީން ވިދާޅުވި އެވެ.

ޔާމީން ވިދާޅުވީ މި ވަރުގެ ޖައްބާރު، ތަނަވަސްކަމާއި ބާރުތައް އޮތް ސަރުކާރެއް ބަލި ކުރެވުމަކީ ނިއުމަތެއް ކަމަށެވެ. މި ސަރުކާރުން އޮތީ މުއައްސަސާތަކުގެ ބާރު ކަނޑުވާލައި ރައްޔިތުން މަގުމަތި ކޮށްފައި ކަމަށާއި ޑިމޮކްރަސީ އަށް އެންމެ ބޮަޑަށް މަލާމަތްކުރި ފަސް އަހަރަކީ ވެސް މިއީ ކަމަށް ޔާމީން ވިދާޅުވި އެވެ.