މި ސަރުކާރުގެ "ގެދޮރުވެރިޔާ" ސްކީމުގެ ދަށުން 4،000 ފްލެޓު ލިބޭ މީހުންގެ ލިސްޓު އާންމުކުރާނީ އެ މީހަކަށް ލިބިފައިވާ ޕޮއިންޓު އެނގޭ ގޮތަށް ކަމަށާއި ފްލެޓު ދޭނީ ޕޮއިންޓް ތަރުތީބަށް ބަލައިގެން ކަމަށް ހައުސިން މިނިސްޓްރީގެ ސްޓޭޓް މިނިސްޓަރު އަކްރަމް ކަމާލުއްދީން މިއަދު ވިދާޅުވެއްޖެ އެވެ.

އަކްރަމް އެގޮތަށް ވިދާޅުވި އިރު، ގެދޮރުވެރިޔާ ސްކީމްގެ ދަށުން ދޫކުރާ 4،000 ފްލެޓު އުސޫލާ ހިލާފަށް ބަހާލަން އުޅޭ ކަމަށް ތުހުމަތުކޮށް އެންޓި ކޮރަޕްޝަން ކޮމިޝަން (އޭސީސީ) އަށް ވަނީ މައްސަލައެއް ހުށަހަޅައިފަ އެވެ.

އެކަމާ ގުޅިގެން އަކްރަމް ވިދާޅުވީ މި މަހުގެ ފަހެއްގެ ކުރިން ފްލެޓު ލިބޭ މީހުންގެ ލިސްޓް އިއުލާން ކުރާނެ ކަމަށެވެ. އަދި އެ ލިސްޓުގައި ހިމެނޭ ފަރާތްތަކަށް ދީފައިވާ ޕޮއިންޓު ވެސް ފެންނަން ހުންނާނެ ކަމަށް އަކްރަމް ވިދާޅުވި އެވެ.

ފްލެޓަށް ކުރިމަތިލުމަށް ގެޒެޓު ކުރި އިއުލާނާއި ޕޯޓަލްގައި ވެސް ޕޮއިންޓް ދޭނެ އުސޫލުތައް ފެންނަން ހުންނާނެ އިރު، ފްލެޓު ދޭނީ އެންމެ މަތިން ޕޮއިންޓް ލިބޭ މީހުންނަށް ކަމަށް ވެސް އޭނާ ވިދާޅުވި އެވެ.

ފްލެޓު ލިބޭ ހުރިހާ ގެއެއް، ދިރިއުޅުމުގެ ހާލަތު ބަލަން ސާވޭ ކުރަން ދާން ހައުސިން މިނިސްޓްރީން އެއްވެސް އިރެއްގައި ނުނިންމާ ކަމަށާއި ހުރިހާ ގެއެއްގައި ސާވޭ ކުރާނެ ކަން ވެސް އަންގާފައި ނުވާނެ ކަމަށެވެ. އެކަމަކު، ބައެއް ގެތައް ރެންޑަމް ކޮށް ސާވޭ ކޮށްފައިވާ ކަމަށާއި އެ މަސައްކަތް ދެ މަހެއްހާ ދުވަހަށް ކުރިޔަށް ގެންދިޔަ ކަމަށް އަކްރަމް ވިދާޅުވި އެވެ.

އާންމުންގެ މީހަކު އޭސީސީއަށް ހުށަހެޅި މައްސަލަގައި ބުނެފައިވަނީ، ފްލެޓް ލިބޭނެ ކަމަށް ކަނޑައެޅި މީހުންގެ ތެރެއިން، ފުރަތަމަ ހަވާލުކުރުމަށް ސަރުކާރުން ނިންމާފައިވާ 4،000 ފްލެޓް ހަވާލުކުރުމަށް އެންމެ އިންސާފުވެރި ގޮތަކީ ފޮއިންޓް ލިބިފައިވާ ތަރުތީބުން ފްލެޓްތައް ހަވާލު ކުރުން ކަމަށެވެ.

ނަމަވެސް ފްލެޓް ލިބުނު މީހުންނަށް ޕޮއިންޓް ލިބުނު ގޮތް މިހާތަނަަށް ވެސް ސަރުކާރުން ހާމަކޮށްފައި ނުވާ ކަމަށް އޭސީސީއަށް ހުށަހެޅި މައްސަލާގައި ބުނެފައި ވެއެވެ. ފްލެޓް ހަވާލުކުރާނީ ލިބޭ ފަރާތްތަކުގެ ދިރިއުޅުމުގެ ހާލަތަށް ބަލާފައިކަމަށް ބުނެފައިވީ ނަމަވެސް ސަރުކާރުގެ ކަމާއި ގުޅުންހުރި އިދާރާތަކުން އެކަން ކޮށްފައި ނުވާކަމަށާއި، އެކަމަށް މިހާރު ވަގުތެއް ވެސް ނެތް ކަމަށް ސިޓީގައިވެ އެވެ.

ގެދޮރުވެރިޔާ ސްކީމްގެ ދަށުން ފްލެޓަށް ކުރިމަތިލާން ހުޅުވާލުމުން 20،000 އަށް ވުރެ ގިނަ މީހުން ކުރިމަތިލި އެވެ. ހައުސިން މިނިސްޓްރީން ވަނީ 13،000 މީހުން ޝަރުތު ހަމަވާ ކަމަށާއި އެ އެންމެނަށް ފްލެޓު ދޭނެ ކަމަށް ބުނެފަ އެވެ. ސަރުކާރުން ފުރަތަމަ މަސައްކަތް ކުރަނީ ފަހި ދިރިއުޅުން ކޯޕަރޭޝަނުން އަޅާ 4،000 ފްލެޓު ދިނުމަށެވެ.