ކުރިއަށް އޮތް ފަސް އަހަރަށް، ޑރ. މުހައްމަދު މުއިއްޒު ރާއްޖޭގެ ރައީސުލްޖުމްހޫރިއްޔާ ކަމުގެ ހުވާ ކުރައްވަން މާދަމާ ހަވީރު ބައްވާ ހާއްސަ ރަސްމިއްޔާތުގައި ކުރީގެ ރައީސް އަދި ޕީޕީއެމްގެ ރައީސް އަބްދުﷲ ޔާމީން ބައިވެރިވެ ވަޑައިނުގަންނަވަން ނިންމަވައިފި އެވެ.

މާދަމާ ހަވީރު ޖުމްހޫރީ މައިދާނުގައި ބާއްވާ ހާއްސަ ރަސްމިއްޔާތުގައި ޔާމީން ބައިވެރިވެ ވަޑައިގަތުމަށް ރައްޔިތުންގެ މަޖިލީހުން އެމަނިކުފާނަށް ދައުވަތު ވެސް ފޮނުވާފައިވެ އެވެ.

އެކަމަކު ޖިނާއީ ކުށެއް ސާބިތުވެފައިވާ މީހަކު އެ ކަހަލަ ޖަލްސާއެއްގައި ބައިވެރިވުމަކީ އެ ޖަލްސާގެ ކަރާމާތަށް އުނިކަން ލިބޭނެ ކަމެއް ކަމަށް ވިދާޅުވެ މަޖިލީހަށް އެމަނިކުފާނު ވަނީ އެކަން އަންގަވައިފަ އެވެ. އަދި އެއީ ތަހުޒީބީ މުޖުތަމައުތަކުގައި ގަބޫލުކުރާ އުސޫލުތަކާ ހިލާފު ކަމެއް ކަމަށް ވިދާޅުވެފައިވެ އެވެ.

ރިޝްވަތާއި މަނީލޯންޑަރިންގެ ކުށުގައި 11 އަހަރުގެ ޖަލު ހުކުމެއް ތަންފީޒު ކުރައްވާ ޔާމީން މިވަގުތު ހުރީ ގެއަށް ބަދަލުކޮށްފަ އެވެ.

ފަސް އަހަރަށް ރައީސް ކަމުގެ ހުވާކުރުމަށް ބާއްވާ ރަސްމިއްޔާތުގައި 46 ގައުމެއްގެ ބޭފުޅުން ބައިވެރިވެ ވަޑައިގަންނަވަ އެވެ.