އަންކިތާ ލޯކަންޑޭއާއި ސުޝާންތު ސިންހް ރާޖްޕުތުއަކީ އެއްއިރެއްގައި ވަރަށް މަގުބޫލު ޖޯޑެކެވެ. ސުޝާންތުގެ މަރާއެކު އަންކިތާ ވަނީ އެކިފަހަރު މަތިން ސުޝާންތުގެ ހަނދާންތައް އާކޮށްފަ އެވެ.

އެގޮތުން މިހާރު ކުރިއަށްދާ ބިގްބޮސް 17ގައި ބައިވެރިވެގެން އުޅޭ އަންކިތާ އަނެއްކާ ވެސް މިވަނީ ސުޝާންތުއާ ބެހޭ ގޮތުން ވާހަކަ ދައްކާފަ އެވެ. މިފަހަރު އޭނާ ވަނީ ކުރިން ނޭނގޭ ސުޝާންތުގެ ސިއްރުތަކެއް ވެސް ހިއްސާކޮށްފަ އެވެ.

ބިގްބޮސްގައި ވާހަކަ ދައްކަމުން އަންކިތާ ބުނީ ސުޝާންތު ދިރިއުޅުމުގައި ހާސިލް ކުރަން ބޭނުންވި ކަންތައްތައް ލިޔެގެން ބަކެޓް ލިސްޓް ޑައިރީއެއް ގެންގުޅުނު ކަަމަށާއި އެ ޑައިރީ އަދިވެސް އޭނާ އަތުގައި އެބައޮތް ކަމަށެވެ.

"އޭނާއަކީ ވަރަށް ގިނަ ކަންތައްތައް ކުރަން ބޭނުންވި މީހެއް. އެ ފޮތުގައި އެހުރިހާ ކަމެއް ލިޔެފައި އެބައޮތް. ގިނަ ކަންތައްތައް ހުރީވެސް ކޮށް ނިމިފައި" އަންކިތާ ބުންޏެވެ.

ސުޝާންތުގެ ބޮލީވުޑް ކެރިއަރާ ބެހޭ ގޮތުން ވާހަކަ ދައްކަމުން އަންކިތާ ބުނީ ސުޝާންތުގެ ފުރަތަމަ ފިލްމު ބަލާފައި އޭނާއަށް ރޮވުނު ކަމަށާއި ސުޝާންތުއަކީ ހުނަރުވެރި ތަރިއެއްކަން އެ ފިލްމުންވެސް އެނގުނު ކަމަށެވެ.

ބޮލީވުޑް ދާއިރާއާ އެއްވެސް ގުޅުމެއް ނެތް މީހަކު އޭނާގެ ބޮލީވުޑް ކެރިއަރުގައި އެވަރުގެ ކާމިޔާބީއެއް ހޯދުމަކީ ވެސް ހައިރާން ވާންޖެހޭ ކަމެއް ކަމަށް އަންކިތާ ބުންޏެވެ.

އަންކިތާއާއި ސުޝާންތު ދިމާވެ ލޯބީގެ ގޮތުން ގުޅިފައިވަނީ ހިންދީ ޓީވީ ސީރީޒްއެއް ކަމަށްވާ "ޕަވިތުރާ ރިޝްތާ"އިންނެވެ. ސުޝާންތުގެ މަރަށްފަހު އަންކިތާ މިހާރު އުޅެނީ ކައިވެންޏެއް ކޮށްގެންނެވެ.