މިހާރު ސިނަމާތަކުގައި ދައްކަމުން އަންނަ ސަންދީޕް ވެންގާގެ "އެނިމަލް" ފިލްމުގައި މުހިއްމު ރޯލަކުން ފެންނަ އެއް ތަރިއަކީ ބޮބީ ޑިއޯލް އެވެ.

ގިނަ ދުވަސްތަކެއް ވަންދެން ބޮލީވުޑްއާ ދުރުގައި ހުރުމަށްފަހު ކުޅުނު ފުރަތަމަ ފިލްމުގައި އޭނާގެ ހުނަރު ރަނގަޅަށް ދައްކާލެވޭނެ ކަމާމެދު ގިނަ ބަޔަކު ސުވާލުވެސް އުފެއްދި އެވެ.

އެހެން ނަމަވެސް އެމީހުންގެ ސުވާލުތަކަށް ބޮބީ ޖަވާބު ދިނީ އޭނާގެ މޮޅު އެކްޓިން އިންނެވެ. ފިލްމުގައި ބޮބީ ދައްކުވައިދިން އެކްޓިންއަށް އާއްމުންގެ ތައުރީފް ލިބެމުން އަންނައިރު ގިނަ ބަޔަކު އަންނަނީ އޭނާގެ ތައްޔާރީތައް ފާހަގަކޮށްފަ އެވެ.

އެގޮތުން ފިލްމުގައި ބޮބީ ކުޅެނީ މަންމަން ކެރެކްޓަރެއް ކަމުން ވާހަކަ ދެއްކުމަށްޓަކައި އޭނާ ބޭނުންކުރި އިޝާރާތުގެ ބަސް ވަރަށް ރަނގަޅަށް ދަސްކޮށްފައިވާ ކަމަށް މީހުން ބުނެ އެވެ.

މިކަމާ ބެހޭ ގޮތުން ބޮބީ ބުނީ ވާހަކަ ނުދެއްކޭ އެންޓެގޮނިސްޓެއްގެ ބައި ކުޅުމަކީ ފަސޭހަ ކަމެއް ނޫން ކަމަށާއި އިޝާރާތުގެ ބަސް (ސައިން ލެންގްއޭޖް) ދަސްކުރަން އެއްމަސް ދުވަސް ހޭދަވި ކަމަށެވެ.

އެދުވަސްވަރު އާއްމު ދިރިއުޅުމުގައި ވެސް އެހެން މީހުންނާ ވާހަކަ ދައްކަން އިޝާރާތުގެ ބަަސް ބޭނުންކުރި ކަމަށާއި އެކަމުން ފިލްމުގައި އެ އެކްޓިން ދައްކުވައިދޭން ވަރަށް ބޮޑުތަން ފަސޭހަވި ކަމަށް ބޮބީ ބުންޏެވެ<

ބޮބީ އިތުރަށް ބުނީ އެނިމަލްގައި އޭނާ ދައްކުވައިދިން ރޯލު އިހުތިޔާރުކުރީ ތަފާތު ކެރެކްޓަރެއް ކުޅުމުގެ ބޭނުމުގައި ކަމަށާއި އެކަން ވަރަށް ރަނގަޅަށް ހާސިލްވި ކަމަށެވެ. ބޮބީއަކީ އާއްމުކޮށް ލޯބީގެ ފިލްމުތަކުން ފެންނަ ތަރި އެކެވެ.