މިހާރު ސިނަމާތަކުގައި ދައްކަމުން އަންނަ ރަންބީރު ކަޕޫރުގެ ފިލްމް "އެނިމަލް"އަށް އިންޑިއާގެ ގާނޫނު ހަދާ މަތީ މަޖިލިސް ރާޖްޔާ ސަބާގެ މެމްބަރަކު ފާޑު ކިޔައިފި އެވެ.

މަޖިލީހުގެ ޖަލްސާއެއްގައި ވާހަކަ ދައްކަމުން އެ މަޖިލީހުގެ މެމްބަރެއް ކަމަށްވާ ރަންޖީތު ރަންޖަން ވިދާޅުވީ "އެނިމަލް"އަކީ ތަޅާފޮޅުމާއި އަނިޔާވެރިކަމަށް ހިތްވަރުދޭ ފިލްމެއް ކަމަށެވެ.

"ފިލްމުތަކަކީ މުޖުތަމައުގެ ފަރުދުން މިސާލަކަށް ބަލާނެ ކަމެއް. އެހެން ވީއިރު ކަބީރު ސިންހް، ފުޝްޕާ އަދި އެނިމަލް ފަދަ ފިލްމުތައް އާއްމުވުމަކީ ނުރައްކާ ކަމެއް" ރަންޖަން ވިދާޅުވި އެވެ.

ރަންޖަން ވަނީ އަނިޔާވެރިކަމަށް ހިތްވަރުދޭ މިފަދަ ފިލްމުތަކަށް ހުއްދަ ދޭ ސެންޓްރަލް ބޯޑް އޮފް ފިލްމް ސެޓިފިކޭޝަންއާ ދޭތެރޭ ވެސް ސުވާލު އުފައްދާފަ އެވެ.

"އެނިމަލް"އަކީ އަންޑަވާލްޑްއާއި ކުށުގެ ވެށީގައި އުޅޭ އާއިލާއެއްގެ މައްޗަށް ބިނާކޮށް ހަދާފައިވާ ފިލްމެކެވެ. ރަންބީރުގެ އިތުރުން ފިލްމުގެ އެހެން މުހިއްމު ރޯލުތަކުން ރަޝްމިކާ މަންދަނާ، ބޮބީ ޑިއޯލް އަދި އަނިލް ކަޕޫރު ފެނިގެންދެ އެވެ.

ޑިސެމްބަރު އެއްވަނަ ދުވަހު ނެރުނު އެނިމަލްއަށް ބޮކްސްއޮފީހުގައި ގިނަ ކާމިޔާބީތަކެއް ލިބެމުން އަންނައިރު ތަރިންގެ އެކްޓިންއަށް ވެސް ތައުރީފް އަންނަނީ ލިބެމުންނެވެ.