އަނަންޔާ ޕާންޑޭއަކީ މިހާރު ބޮލީވުޑްގައި އަރަމުން އަންނަ ޒުވާން ތަރިންގެ ތެރެއިން ފާހަގަކޮށްލެވޭ ތަރި އެކެވެ. އޭނާގެ ކުރު ފިލްމް ކެރިއަރުގައި ގިނަ މަސައްކަތްތަކެއް ކޮށްފައިވާ އަނަންޔާއަކީ އޭނާގެ އާއިލާދެކެ ވެސް އިންތިހާއަށް ލޯބިވާ ތަރި އެކެވެ.

އެގޮތުން އަނަންޔާ ވަނީ އޭނާއަށް ލިބުނު އެންމެ ފުރަތަމަ މުސާރަ ހޭދަކުރީ އަންހެން ކޮއްކޮގެ ޓިއުޝަން ފީތައް ދައްކަން ކަމަށް ބުނެފަ އެވެ.

އަނަންޔާ މިހެން ބުނެފައިވަނީ އޭނާގެ ކުރިއަށް އޮތް ފިލްމު "ކޯ ގަޔޭ ހަމް ކަހާން"ގެ ޓްރެއިލާ ރިލީޒް ކުރަން ބޭއްވި ހަފްލާއެއްގައި ވާހަކަ ދައްކަމުންނެވެ.

އަނަންޔާ ބުނީ އޭނާ ބޭނުންވީ ކޮންމެވެސް ގޮތަކުން ކޮއްކޮގެ ތައުލީމަށް އެހީވެދޭން ކަމަށާއި ޓިއުޝަން ފީ ދައްކައިދިނީ އެހެން ވެގެން ކަމަށެވެ.

އެ ޓްރެއިލާ ލޯންޗިންގައި ފިލްމުގެ ތަރިން އެމީހުންގެ ފުރަތަމަ މުސާރައިން ކުރީ ކަން ކަމެއްތޯ މީޑިއާއިން ސުވާލު ކުރި އެވެ. އެ ސުވާލަށް އަނަންޔާ ދިނީ އެ ޖަވާބެވެ.

އަނަންޔާގެ އިތުރުން ފިލްމުން ފެނިގެންދާ ސިދުހާތު ޗަތުރްވެދީ ބުނީ އޭނާ ފުރަތަމަ މުސާރައިން ގަތީ ކޮއްކޮއަށް ޕީއެސް 5އެއް ކަމަށެވެ.

އަނަންޔާއަކީ ވެޓެރަން އެކްޓަރު ޗަންކީ ޕާންޑޭއާއި އޭނާގެ އަންހެނުން ބަވާނާ ޕާންޑޭގެ ދޮށީ ދަރިފުޅެވެ. އޭނާގެ ހަގަށް އުމުރުން 19 އަހަރުގެ އަންހެން ކޮއްކޮއެއް ހުރެ އެވެ.

އަނަންޔާއާއި ސިދްހާތުގެ އިތުރުން އާދަރްޝް ގައުރަވް ފެނިގެންދާ ކޯ ގަޔޭ ހަމް ކަހާން ރިލީޒް ކުރަން ހަމަޖެހިފައިވަނީ ޑިސެމްބަރު މަހުގެ 26 ވަނަ ދުވަހު ނެޓްފްލިކްސްގަ އެވެ.