ބޮބީ ޑިއޯލްގެ އެންމެ ފަހުގެ ފިލްމު "އެނިމަލް"ގައި ތަރިން ދައްކުވައިދިން އެކްޓިންއަށް އާއްމުންނާއި ފާޑުކިޔުންތެރިންގެ ތައުރީފު އަންނަނީ ލިބެމުންނެވެ.

އެހެން ނަމަވެސް އޭނާގެ ބޭބެ ސަނީ ޑިއޯލްގެ ހިޔާލު އެކަމުގައި ކޮންމެވެސް ވަރަކަށް ތަފާތުވެ އެވެ. ފިލްމު ނެރުނުތާ ގާތްގަނޑަކަށް ދެ ހަފްތާ ފަހުން ސަނީ މިވަނީ އޭނާގެ ކޮއްކޮގެ ފިލްމަށް "ރިވިއު" އެއް ދީފަ އެވެ.

ސަނީ ބުނީ އޭނާ އެނިމަލް ބެލި ކަމަށާއި އެ ފިލްމަކީ އާއްމުކޮށް ރީތި ފިލްމެއް ނަމަވެސް ފިލްމުގައި އޭނާ އެއްބަސްނުވާ ބައެއް ކަންކަން ވެސް ހުރި ކަމަށެވެ.

"އަހަރެން ފިލްމު ބަލައިފިން. ފިލްމަކީ ވަރަށް ރީތި ފިލްމެއް، އެކަމަކު އޭގައި އަހަންނަށް ކަމުނުދާ ބައެއް ކަންކަން ވެސް ހިމެނޭ. އެކަމަކު އެއީ ހަމަ ކޮންމެ ފިލްމެއްގައި ވެސް ހުންނާނެ ކަންކަން" ސަނީ ބުންޏެވެ.

ރިޕޯޓުތައް ބުނާ ގޮތުގައި ސަނީ އެ އިޝާރާތް ކުރަނީ ފިލްމުގައި ދައްކުވައިދީފައިވާ އަނިޔާވެރިކަމާއި ގައިގޯޅި މަންޒަރުތަކުގެ އިތުރުން އިންސާނިއްޔަތާ ހިލާފު ކަންކަމަށެވެ.

މިކަންކަމާ ހެދި އެ ފިލްމަށް ބައެއް ފާޑުކިޔުންތައް އަމާޒުވި ނަމަވެސް އާއްމު ގޮތެއްގައި ގިނަ މީހުން ފާހަގަ ކުރަނީ އެކްޓަރުން ދައްކުވައިދީފައިވާ އެކްޓިންގެ މޮޅުކަމެވެ.

އެނިމަލް ނެރުނުތާ ދެ ހަފްތާ ވެފައިވާއިރު މުޅި ދުނިޔެއިން އެ ފިލްމަށް އާމްދަނީގެ ގޮތުގައި 800 ކްރޯޑް ލިބިފައިވާ ކަމަށް ތަފާސް ހިސާބުތަކުން ދައްކަ އެވެ.