އުމުރާ ގުޅޭ ލޯބީގެ ފިލްމުތައް ލިބޭނަމަ އެފަދަ ފިލްމުތައް ކުޅެން ތައްޔާރު ކަމަށް ބޮލީވުޑްގެ މަގުބޫލު އެކްޓަރު އާމިރު ޚާން ބުނެފި އެވެ.

މިފަހުން ބޭއްވި ނޫސްވެރިންގެ ބައްދަލުވުމެއްގައި ދެން ދުވަހަކު ވެސް ލޯބީގެ ފިލްމަކުން ފެނިދާނެތޯ އާމިރުއާ ސުވާލު ކުރުމުން އޭނާ ބުނީ އެކަމަށް ފުރުސަތު އެބައޮތް ކަމަށެވެ.

"މި އުމުރުގައި ލޯބީގެ ވާހަކަތަކަކީ ވަރަށް މަދު އަދި އާއްމު ނޫން ވާހަކަތަކެއް. އެކަމަކު ރަނގަޅު ސްކްރިޕްޓެއް ލިބި އަހަރެންގެ އުމުރާ ގުޅޭނަމަ އެކަން ނުކުރާންވީ ސަބަބެއް ނެތް" އާމިރު ބުންޏެވެ.

މިފަހުގެ އަހަރުތަކުގައި އާމިރު މުޅިން ވެސް ފެނިފައިވަނީ ތަފާތު ޖެންރަތަކުގެ ފިލްމުތަކުންނެވެ. އޭގެ ތެރޭގައި ޕީކޭ، ޑަންގަލް އަދި ލާލް ސިންހް ޗައްދާ ހިމެނެ އެވެ.

އެހެން ނަމަވެސް 1990ގެ އަހަރުތަކުގައި އާމިރު މަޝްހޫރުވެފައިވަނީ ރޮމޭންޓިކް ހީރޯއެއްގެ ގޮތުގަ އެވެ. އޭނާގެ މަޝްހޫރު ލޯބީގެ ފިލްމުތަކުގެ ތެރޭގައި "ގަޔާމަތުސޭ ގަޔާމަތު ތަކް"، "ދިލް" އަދި "ރާޖާ ހިންދުސްތާނީ" ހިމެނެ އެވެ.