ބަޖެޓު ސަޕޯޓުގެގޮތުގައި އިންޑިއާ ސަރުކާރުން ރާއްޖެއަށް ދީފައިވާ 50 މިލިއަން ޑޮލަރު އަނބުރާ ދެއްކުމަށް ލުއި ގޮތްތަކެއް ހަމަޖައްސައިދީފި އެވެ.

ފޮރިން މިނިސްޓްރީން މިއަދު ނެރުނު ނޫސް ބަޔާނެއްގައި ބުނެފައި ވަނީ މިމަހު ދައްކަން ޖެހޭ 50 މިލިއަން ޑޮލަރު އަނބުރާ ދެއްކުމަށް އެއް އަހަރު ދުވަހުގެ މުއްދަތެއް އިންޑިއާ ސަރުކާރުން ދީފައިވާ ކަމަށެވެ.

ބަޖެޓު ސަޕޯޓުގެގޮތުގައި ސަރުކާރުން 2019 ވަނަ އަހަރު އިންޑިއާއިން ނަގާފައިވާ 200 މިލިޔަން ޑޮލަރުގެ ތެރެއިން 50 މިލިއަން ޑޮލަރު މިދިޔަ ޖެނުއަރީ މަހު އިންޑިއާއަށް ވަނީ ދައްކާފައިވާ އެވެ. އަދި ނުދައްކާ އޮތް 150 މިލިއަން ޑޮލަރުގެ ތެރެެއިން މި މެއި މަހަށް ދެއްކަންޖެހޭ 50 މިލިއަން ޑޮލަރު އަނބުރާ ދެއްކުމަށް އެއް އަހަރު ދުވަހުގެ މުއްދަތެއް ދީފައިވާ ކަމަށް އެ މިނިސްޓްރީން ބުނެ އެވެ.

އިންޑިއާއިން ވެދިން އެހީތެރިކަމަށް ޝުކުރު އަދާކޮށް، ފޮރިން މިނިސްޓަރު މޫސާ ޒަމީރު އެކްސްގައި ކުރެއްވި ޕޯސްޓެއްގައި ވިދާޅުވެފައި ވަނީ މިއީ ރާއްޖެއާއި އިންޑިއާއާއި ދެމެދު އޮތް ޒަމާންވީ ގާތްގުޅުން ދައްކައިދޭ ކަމެއް ކަމަށް ވިދާޅުވެފަ އެވެ.

ޒަމީރު މިދިޔަ ހަފްތާގައި ވަނީ އިންޑިއާގެ އެކްސްޓާނަލް އެފެއާޒް މިނިސްޓަރު ޑރ. އެސް ޖައިޝަންކަރުގެ ދަޢުވަތަކަށް އެ ގައުމަށް ރަސްމީ ދަތުރުފުޅެއް ކުރައްވާފަ އެވެ.

މި ދަތުރުފުޅާއި ގުޅޭގޮތުން ވަޒީރު ޒަމީރު ވިދާޅުވީ ރާއްޖެއަށް ދިމާވާ ކަންކަމުގައި އަބަދު ވެސް އެހީތެރިވާނެ ކަމުގެ ޔަގީންކަން އިންޑިއާއިން ދީފައިވާ ކަމަށެވެ. އެގޮތުން އިންޑިއާއިން ދައްކަންޖެހޭ ލޯނުތަކަށް ލުއި ގޮތްތަކެއް ހައްދަވައިދެއްވާނެކަމުގެ ޔަގީންކަން އިންޑިއާގެ ހާރިޖީ ވަޒީރު ދެއްވާފައިވާ ކަމަށް ވެސް މިނިސްޓަރު ވިދާޅުވި އެވެ.