ބޯހިޔާވަހިކަމުގެ މަޝްރޫއުތަކުގައި މައިންބަފައިންނާއި ދޮށީ އުމުރުންގެ މީހުން ބަލަހައްޓާ މީހުންނަށް އިތުރު ޕޮއިންޓް ލިބޭނެ ގޮތަށް އުސޫލު ކަނޑައެޅުމަށް ރައީސް ޑރ. މުހައްމަދު މުއިއްޒު އިއްޔެ ނިންމަވައިފި އެވެ.

އެމަނިކުފާނު އެގޮތަށް ނިންމަވާފައި ވަނީ ޖެންޑާ މިނިސްޓްރީން ކެބިނެޓް ބައްދަލުވުމަށް ހުށަހެޅި ކަރުދާހެއްގެ މައްޗަށް ބިނާކޮށެވެ.

ރައީސް އޮފީހުން ބުނީދޮށީ އުމުރުގެ މީހުންނާއެކު އާއިލާތަކަށް ދިރިއުޅެވޭނެ މަގުފަހި ކުރުމުގެ ގޮތުން ސަރުކާރުން އަލަށް ފަށާ ބޯހިޔާވަހިކަމުގެ ސްކީމުތަކުގައި މައިންބަފައިންނާއި ދޮށީ އުމުރުންގެ މީހުން ބަލަހައްޓާ މީހުންނަށް އިތުރު ޕޮއިންޓް ލިބޭނެ ގޮތް ހަމަޖައްސާނެ ކަމަށެވެ.

ދޮށީ އުމުރުގެ މީހުންނަށް ލިބިދޭންޖެހޭ ހައްގުތައް ރައްކާތެރިކޮށްދިނުމުގެ ގޮތުން، ޤާނޫނާއި ގަވާއިދުތަކަށް ގެންނަންޖެހޭ ބަދަލުތައް ގެންނެވުމަށް ވަޒީރުންގެ މަޖިލީހުގެ ލަފާފުޅާއެކު އެމަނިކުފާނު ވަނީ ނިންމަވައިފަ އެވެ.

މާލޭގައި ދާދި ފަހުން ގާއިމު ކުރި އިސް ރަށްވެހިންގެ ނާދީ ހުޅުވުމުގެ ރަސްމިއްޔާތުގައި ވާހަކަފުޅު ދައްކަވަމުން ރައީސް ޑރ. މުއިއްޒު ވިދާޅުވީ އުމުރުން ދުވަސްވީ މައިންބަފައިންނާއި އެހެނިހެން މީހުން ބަލަހައްޓާ މީހުންނަށް އިސްކަން ދެވޭނެ ކަމަށެވެ.

އަދި އުސޫލުތައް ކަނޑައެޅިގެންދާއިރު އެކަހެރިކޮށް ދިރިއުޅޭ ދޮށީއުމުރުގެ މީހުންނަށް ސަރުކާރުގެ ސޯޝަލް ހައުސިން ސްކީމުތަކުގެ ތެރެއިން ދޫކުރާ ފްލެޓަށް ނުވަތަ އިޖުތިމާއީ ބޯހިޔާވަހިކަމަށް ކުރިމަތިލެވޭނެ އުސޫލު ވެސް ކަނޑައެޅޭނެ ކަމަށް ވިދާޅުވި އެވެ.

ސަރުކާރުން މަޖިލިހަށް ހުށަހެޅި ސޯޝަލް ހައުސިން އާ ބެހޭ ބިލުގައި އުމުރުން ދުވަސްވީ، ބަލި ހާލަތު ދަށް މީހުންނާއި ނުކުޅެދުންތެރިކަމެއް ހުންނަ މީހުންނާއި ނުކުޅެދުންތެރިކަމެއް ހުންނަ ފަރާތެއްގެ ބަލަދުވެރިން ނުވަތަ ބަލަމުން އަންނަ މީހުންނާއި ބޮޑު ބައްޔެއް ތަހައްމަލު ކުރަމުންދާ މީހުންނާއި ބޮޑު ބައެއް ތަހަމައްލު ކުރަމުންދާ މީހުންގެ ޑިޕެންޑެންޓެއް ބަލަމުންދާ މީހުންނަށް ބޯހިޔާވަހިކަމުގެ ސްކީމްތަކުން އިސްކަން ދޭން ވާނެ ކަމަށް ބުނެފައިވެ އެވެ.