ކުރީގެ ރައީސް އިބްރާހިމް ނާސިރުގެ ވެރިކަމުގައި ޕަބްލިކް ސޭފްޓީ މިނިސްޓަރުކަން ކުރެއްވި ސުމުއްވުލްއަމީރް އަބްދުލްހަންނާން ހަލީމް ދޮށިމޭނާކިލެގެފާނު މިއަދު އަވަހާރަވެއްޖެ އެވެ.

އުމުރުފުޅުން 87 އަހަރުގައި އަބްދުލްހަންނާން އަވަހާރަވީ ޓްރީ ޓޮޕް ހޮސްޕިޓަލްގައި ފަރުވާ ހޯއްދަވަމުން ގެންދަވަނިކޮށެވެ.

އަބްދުލްހަންނާން ޕަބްލިކް ސޭފްޓީ މިނިސްޓަރުކަން ކުރެއްވީ 1968 އިން 1978 އަށް ވަނަ އަހަރަށެވެ. އަބްދުލްހަންނާން ހަލީމަކީ ރާއްޖޭގެ ދެވަނަ ޖުމްހޫރިއްޔާގެ ދަށުން އެކުލަވާލި ފުރަތަމަ ރައްޔިތުންގެ މަޖިލީހުގެ މެމްބަރުކަން ކުރެއްވި ބޭފުޅެކެވެ.

ރައީސް އިބްރާހިމް ނާސިރު އެކުލަވާލެއްވި ކެބިނެޓުގެ މިނިސްޓަރުންގެ ތެރެއިން މިއަދާ ހަމައަށް ދުނިޔޭގައި ހުންނެވި ހަމައެކަނި ކިލޭގެފާނަކީ އަބްދުލްހަންނާނެވެ.

ރައީސް ނާސިރުގެ ފުރަތަމަ ކެބިނެޓް

އަބްދުލްހަންނާނު އަވަހާރަވުމުން ރައީސް ޑރ.މުހައްމަދު މުއިއްޒު ވަނީ އޭނާގެ އާއިލާއަށް ތައުޒިޔާ ފޮނުއްވައިފަ އެވެ. ރައީސް މުއިއްޒު ވިދާޅުވީ އަބްދުލްހަންނާނަކީ ދައުލަތަށް އެތައް ގިނަގުނަ ހިދުމަތްތަކެއް ކޮށްދެއްވާފައިވާ ބޭފުޅެއް ކަމަށާއި، އެބޭފުޅާ އަވަހާރަވުމަކީ ގައުމަށް ލިބުނު ފުން ހިތާމައެއް ކަމަށެވެ.

އަބްދުލްހަންނާންގެ އާއިލާއަށް ކެތްތެރިކަން މިންވަރުކޮށްދެއްވުމަށާއި ﷲ ގެ ރުއްސެވުމާ ފުއްސެވުމުގައި އެކިލޭގެފާނުގެ ފުރާނަފުޅު ލަހައްޓަވައި، ސުވަރުގޭގެ ދާއިމީ ނިއުމަތްދެއްވުން އެދި ހެޔޮ ދުއާ ދަންނަވާ ކަމަށް ރައީސް ވިދާޅުވި އެވެ.

ޖަނާޒާ އޮންނާނީ މިރޭ އިޝާ ނަމާދަށް ފަހު ހުޅުމާލޭ ސަހަރާގަ އެވެ.