ރާއްޖެއާއި ޗައިނާއާ ދެމެދު ރަސްމީ ވާހަކަތައް ބާއްވައިފި އެވެ.

ފޮރިން މިނިސްޓަރު މޫސާ ޒަމީރު މިހާރު ޗައިނާއަށް ކުރައްވަމުންގެންދަވާ ދަތުރުފުޅުގެ ތެރެއިން މިވާހަކަތައް ބާއްވާފައިވަނީ ޗައިނާގެ ސްޓޭޓް ގެސްޓް ހައުސްގަ އެވެ. ރަސްމީ ވާހަކަތައް ކުރިއަށްގެންދިޔައީ ޗައިނާގެ ފޮރިން މިނިސްޓަރު ވަންގ ޔީއާއެކު އެވެ.

މި މަޝްވަރާތަކުގައި މިނިސްޓަރު ޒަމީރު ވަނީ ރައީސް ޑރ. މުހައްމަދު މުއިއްޒުގެ ފަރާތްޕުޅުން ޗައިނާގެ ރައީސް އަދި ރައްޔިތުންނަށް ހެޔޮއެދުންތައް އަރިސްކުރައްވާފަ އެވެ. އަދި ރައީސް މުއިއްޒު ޗައިނާގެ ރައީސް ޝީ ޖިންގްޕިންގްއަށް ފޮނުއްވެވި ދެ ސިޓީފުޅެއް، އެ މަނިކުފާނަށް ރައްދުކޮށްދެއްވުމަށްޓަކައި ޗައިނާގެ ފޮރިން މިނިސްޓަރުގެ އަތްޕުޅަށް އެރުއްވި އެވެ.

ރާއްޖެއިން އަބަދުވެސް ދަމަހައްޓަމުން އަންނަ "ވަން ޗައިނާ ޕޮލިސީ" ދަމަހައްޓާނެކަމުގެ ޔަގީންކަން މިނިސްޓަރު ޒަމީރު ދެއްވި އެވެ.

ފޮރިން މިނިސްޓްރީން ބުނީ ރާއްޖެއާއި ޗައިނާއާ ދެމެދު އެކި ދާއިރާތަކުން ގުޅުން އިތުރުކުރުމާ ގުޅޭގޮތުން އެ ބައްދަލުކުރެއްވުމުގައި ފުޅާދާއިރާއެއްގައި މަޝްވަރާ ކުރެވުނު ކަމަށެވެ.

އެގޮތުން ރާއްޖޭގެ އިޤްތިޞާދީ މުހިންމު ބޮޑެތި މަޝްރޫޢުތައްކަމަށްވާ ޗައިނާ-މޯލްޑިވްސް ފްރެންޑްޝިޕް ބްރިޖާއި، ވެލާނާ އިންޓަރނޭޝަނަލް އެއަރޕޯޓް ތަރައްޤީކުރުމުގެ މަޝްރޫޢު އަދި ބޯހިޔާވަހިކަމުގެ މަޝްރޫޢުތަކަށް ޗައިނާ ސަރުކާރުން ދެއްވާފައިވާ އެހީތެރިކަން ޚާރިޖީ ވަޒީރު ވަނީ ފާހަގަކުރައްވާފައެވެ.

ރައީސުލްޖުމްހޫރިއްޔާ ޑރ.މުޙައްމަދު މުޢިއްޒު އިޢުލާނުކުރައްވާފައިވާ މާލީ އިސްލާޙުތަކާގުޅޭ މަޢުލޫމާތު ވަޒީރުވަނީ ޗައިނާގެ ފޮރިން މިނިސްޓަރާ ޙިއްސާކުރައްވާފައެވެ. އަދި މިމަސައްކަތުގައި ޗައިނާ ސަރުކާރުގެ ފުރިހަމަ އެއްބާރުލެއްވުމާއި އެހީތެރިކަން ލިބޭނެކަމަށް އުންމީދު ކުރައްވާކަމަށް ވިދާޅުވިއެވެ. މިބައްދަލުކުރެއްވުމުގައި ދެ ޤައުމުންވެސް ވަނީ ދެ ޤައުމު ދެމެދު އޮތް ގުޅުން އިތުރަށް ވަރުގަދަކުރުމުގެ ޔަޤީންކަން އައު ކުރައްވައި، ކުރިޔަށް އޮތް ތަނުގައި އެކި ދާއިރާތަކުން ގުޅުން ބަދަހިކުރުމަށްޓަކައި މަސައްކަތްތައް އިތުރުކުރުމަށް އެއްބަސްވެފައެވެ.

މިބައްދަލުވުމުގައި ރާއްޖޭގެ ޚާރިޖީ ވަޒީރުގެ އަރިހުގައި ، މާލީ ވަޒީރު ޑރ. މުޙައްމަދު ޝަފީޤު އާއި، އިމާރާތް ކުރުމާއި ބިނާރާ ބެހކޭ ވަޒީރު ޑރ.ޢަބްދުﷲ މުއްޠަލިބްއާއި، ދިވެހިރާއްޖެއިން ޗައިނާއަށް ކަނޑައަޅާފައި ހުންނަވާ ސަފީރު، ޑރ. ފަޒީލް ނަޖީބްގެ އިތުރުން ދިވެހި ސަރުކާރުގެ އިސްބޭފުޅުންނާއި، ބެއިޖިންގގައި ހުންނަ ދިވެހިރާއްޖޭގެ އެމްބަސީގެ އޮފިޝަލުން ބައިވެރިވެވަޑައިގެންނެވިއެވެ.