ރާއްޖެއަށް މިހާރު ކުރަމުންދާ ވިއްސާރައާ ގުޅިގެން މާލެ ސަރަހައްދުގެ ސްކޫލްތައް މާދަމާ ބަންދުކުރަން ސަރުކާރުން ނިންމައިފި އެވެ.

އެޑިއުކޭޝަން މިނިސްޓްރީން ބުނީ މާލެ، ވިލިމާލެ އަދި ހުޅުމާލޭގެ ސްކޫލްތައް މާދަމާ ބަންދުކުރަން ނިންމާފައިވާ ކަމަށެވެ، އެގޮތަށް ނިންމީ ރާއްޖެއަށް މިހާރު ކުރަމުންދާ ވިއްސާރައިގެ ސަބަބުން މާލޭގެ މަގުތަކުގައި ފެންބޮޑުވެ މަގުތަކުގައި ހިނގާ ބިނގާވެ އުޅެން ދަތިވާ ވަރަށް ފެންބޮޑުވެފައިވާތީ ކަމަށް އެ މިނިސްޓްރީން ބުންޏެވެ.

"މިނިސްޓްރީން އަދި ނިންމާފައި ވަނީ މާދަމާ އެކަނި ސްކޫލްތައް ނިންމަން. ދެން ކުރިއަށްހުރި ދުވަސްތަކުގައި ސްކޫލް ބަންދު ކުރާނީތޯ ނުވަތަ ނޫންތޯ ނިންމާނީ މޫސުމާ ބެހޭ ގައުމީ އިދާރާއިން ދޭ މައުލޫމާތަށް ބެލުމަށްފަހު،" އެ މިނިސްޓްރީގެ އޮފިޝަލަކު ވިދާޅުވި އެވެ.

ވިއްސާރައިގެ ސަބަބުން އަތޮޅުތެރޭގެ އެއްވެސް ރަށެއްގެ ސްކޫލް ބަންދުކުރަން އަދި ނިންމާފައެއްނުވެ އެވެ. އޮފިޝަލް ވިދާޅުވީ ވިއްސާރައާ ގުޅިގެން އަތޮޅުތަކުން ހޯދަންޖެހޭ މައުލޫމާތުތައް ހޯދައި އެއްކުރުމުގެ މަސައްކަތް ކުރަމުން އަންނަ ކަމަށެވެ.

މިއަދު މާލޭގެ ބައެއް ސްކޫލުތަކުގެ މެންދުރުފަހުގެ ދަންފަޅިތައް ވަނީ ބަންދުކޮށްފަ އެވެ.

މާލެއަށް މިއަދު ކުރި ވިއްސާރައިގައި ބޮޑުވެފައިވާ ފެންގަނޑު އަދިވެސް ނުހިނދެ އެވެ. ފެން ހިންދުމުގެ މަސައްކަތް ސިފައިންނާއި ފުލުހުން އަންނަނީ ކުރަމުންނެވެ.

ހއ. އަތޮޅުން ފެށިގެން ލ. އަތޮޅާ ހަމައަށް މިރޭ 9 ޖަހަންދެން ޔެލޯ އެލާޓް ވަނީ ނެރެފަ އެވެ. ކުރިއަށް އޮތް 48 ގަޑިއިރުގެ ތެރޭގައި ވެސް ގުގުރުމާއެކު ބޯކޮށް ވާރޭ ވެހޭނެ ކަމަށް ލަފާ ކުރެވޭ ކަމަށް މޫސުމާ ބެހޭ ގައުމީ އިދާރާއިން ބުންޏެވެ.