ޕީއެންސީގެ ރައްޔިތުންގެ މަޖިލީހުގެ ހޮޅުދޫ ދާއިރާގެ މެމްބަރު އަބްދުއްސައްތާރު މުހައްމަދު ދައުލަތާ ދެކޮޅަށް ވަކާލާތު ކުރަން ހައި ކޯޓަށް ދާތީ ދައުލަތާއި ފަނޑިޔާރުން ސުވާލު އުފެއްދުމުން އޭނާ އެ މައްސަލައިން މިއަދު ވަކިވެވަޑައިގެންފި އެވެ.

މަދަނީ މައްސަލައެއްގައި މިއަދު ހައި ކޯޓުގައި އެލްޖީއޭއާ ދެކޮޅަށް ވަކީލެއްގެ ގޮތުގައި ވަޑައިގެންނެވި ޕީއެންސީއަށް ނިސްބަތްވެ ވަޑައިގަންނަވާ މެމްބަރު ސައްތާރު ވަޑައިގަތުމުން އެކަމާ ގުޅިގެން ފަނޑިޔާރުންގެ ސުވާލު އުފެއްދެވި އެވެ.

ސައްތާރު ވިދާޅުވީ މަޖިލީހުގެ މެންބަރަކަށް ކޯޓުތަކުގައި ވަކާލާތު ނުކުރެވޭނެ ކަމަށް ގާނޫނުގައި ބުނެފައިނުވާ ކަމަށެވެ. އަދި އޭނާ އިންނަވާ ޖުޑިޝަރީ ކޮމެޓީއަކީ ފަނޑިޔާރުން ޖަވާބުދާރީވާން ޖެހޭ ކޮމެޓީއެއް ނޫން ކަމަށް އޭނާ ވިދާޅުވި އެވެ.

ނަމަވެސް ޖޭއެސްސީގެ ނިންމާ ނިންމުންތަކާ ގުޅޭގޮތުން ގޮތް ނިންމަނީ ޖުޑިޝަރީ ކޮމިޓީން ކަމަށް ވާއިރު، މަސްލަހަތު ފުށުނާރާތޯ ވިދާޅުވެ ފަނޑިޔާރުން ސުވާލު ކުރެއްވި އެވެ.

އެލްޖީއޭގެ ފަރާތުން އެޓާނީ ޖެނެރަލްގެ އޮފީހުގެ ވަކީލް ވިދާޅުވީ ދައުލަތުގެ އިދާރާއެއްގައި މަސައްކަތް ކުރާ ފަރާތަކަށް ދައުލަތާ ދެކޮޅަށް ވަކާލާތު ކުރަން ފުރުސަތު ދިނުމަކީ މަސްލަހަތު ފުށުއަރާނެ ކަމެއް ކަމަށެވެ.

އެހެންވެ, ސައްތާރު ވަނީ މައްސަލައިން ވަކިވެ ވަޑައިގެންފަ އެވެ.

މީގެކުރިން ސްޓޭޓް މިނިސްޓަރަކު ދައުލަތާ ދެކޮޅަށް ވަކާލާތު ކުރެއްވި މައްސަލައެއް ފެންމަތިވެ، އެ މައްސަލަ ސަރުކާރުން ބަލަން ފެށި އެވެ. ނަމަވެސް އޭނާއާ މެދު އެއްވެސް ފިޔަވަޅެއް ސަރުކާރުން ނާޅަ އެވެ.