ޕީއެސްއެމްގެ މެނޭޖިން ޑިރެކްޓަރުކަމުން ޒީނާ ޒާހިރު އިސްތިއުފާ ދެއްވައިފި އެވެ.

ސަރުކާރުގެ އޮފިޝަލަކު ވަނީ އެކަން "ހުރިހާ"އަށް ކަށަވަރުކޮށްދީފަ އެވެ.

އެނގިފައިވާގޮތުގައި ޒީނާ އިސްތިއުފާ ދެއްވީ 2013 އިން 2018 އަށް ޕީއެސްއެމް އިން އެކި ކުންފިނިތަކާ ހަވާލުކޮށްފައިވާ ޕްރޮޖެކްޓްތަކަށް ފައިސާ ނުލިބެގެން އެ ފައިސާ ހޯދަން ސިވިލް ކޯޓަށް ހުށަހަޅާފައިވާ މައްސަލަތައް ކޯޓުން ބޭރުން ހައްލުކޮށް އެ ފައިސާ ދިނުމަށް ރައީސް އޮފީހުގެ އިސް ބޭފުޅަކު އެނގެވުމުންނެވެ. ޒީނާ ވަނީ އެކަމަށް އިންކާރުކޮށްފަ އެވެ.

އެނގިފައިވާގޮތުގައި ޒީނާ އެކަމަށް އިންކާރު ކުރީ އެ މައްސަލަތަކުގައި ހިމެނޭ މަސައްކަތްތައް ހަވާލުކުރުމުގައި ކޮރަޕްޝަން ހިމެނޭ ކަމަށް ތުހުމަތުކޮށް އެންޓި ކޮރަޕްޝަން ކޮމިޝަނުން ތަހުގީގުކޮށްފައިވުމާއި އަދި އެކަމުގައި ސުވާލު އުފެދޭ ކަންތައްތަކެއް ހުރި ކަމަށް ތުހުމަތު ކުރެވޭތީ އެވެ.

ޒީނާ ވަނީ މީގެ ދުވަސްކޮޅެއް ކުރިން އިސްތިއުފާ ދެއްވާނެ ކަމުގެ އިޝާރާތެއް ޕީއެސްއެމްގެ މުވައްޒަފުންނަށް ވެސް ދެއްވާފަ އެވެ.

ކޮރަޕްޝަންގެ ތުހުމަތު ކުރެވޭ އެ މައްސަލަތައް އެންޓި ކޮރަޕްޝަން ކޮމިޝަނުން ތަހުގީގުކުރިއިރު، ބައެއް ލިޔެކިޔުންތައް ފެންނަން ނެތްކަން ވަނީ ފާހަގަވެފަ އެވެ. ބެލެވޭގޮތުަގައި އެ ލިޔެކިޔުންތައް ވަނީ ނައްތާލާފަ އެވެ.