އިޒްރޭލާއި ދެކޮޅަށް އަޑުއުފުލަމުންދިޔަ ދެ އަންހެނަކު މިއަދު ހައްޔަރުކުރީ، ސަފީރަކަށް އުނދަގޫކޮށް، އަޑުގަދަކުރާ ބޭނުންކޮށްގެން ހަޅޭއްލެވުމާއި، ބޭއަދަބީ ބަހުރުވައިން މުއާމަލާތްކުރުމުގެ ސަބަބުން ކަމަށް ފުލުހުން ބުނެފި އެވެ.

މިކަމާ ގުޅިގެން ފުލުހުން މިރޭ ނެރުނު ބަޔާނެއްގައި ބުނެފައިވަނީ އެ ދެ މީހުންނަށް ކުރަނީ ސުލްހަވެރިކަމާއެކު އެއްވެއުޅުމުގެ މިނިވަންކަމުގެ ގާނޫނާ ހިލާފަށް ޑިޕްލޮމެޓިކް މިޝަންތަކުގެ ކައިރިއަށް ތަކުރާރުކޮށް އެއްވުމާއި ފުލުހުންގެ ވާޖިބަށް ހުރަސްއެޅުން ފަދަ އަމަލުތަކެއް ހިންގުމުގެ ތުހުމަތެވެ.

މި މައްސަލައިގައި ހައްޔަރުކޮށްފައިވަނީ ދީނީ އިލްމުވެރިޔާ މުހައްމަދު އިޔާޒުގެ އަނބިކަނބަލުން ޢާއިޝަތު ޝާދިޔާ އާއި ޑރ. ޝަޒްރާ އިބްރާހީމް އެވެ.

ފުލުހުން ބުނެފައިވަނީ އެ މީހުނަށް ސުލްހަވެރިކަމާއެކު އެ ސަރަހައްދުން ދިޔުމަށް އެންގުމުން އެކަމަށް އިންކާރުކޮށް ފުލުހުންގެ ވާޖިބު އަދާކުރުމަށް ހުރަސްއެޅުމުގެ ތުހުމަތުގައި ކޯޓު އަމުރެއްގެ ދަށުން އެދެމީހުން މިއަދު މެންދުރުފަހު އެކެއް ޖަހައި އެހާކަންހާއިރު ހައްޔަރުކުރުކޮށްފައި ވާކަމަށެވެ.

އެކި ފަހަރުމަތިން ޝާދިޔާ އާއި ޝަޒުރާއަށް މިފަދައިން އަމަލުނުކުރުމަށް ނަސޭހަތްދީފައިވާނެ ކަމަށް ވެސް ފުލުހުން ބުންޏެވެ.

ޝަޒްރާ އާއި ޝާދިޔާ އަކީ އިޒްރޭލުން ފަލަސްތީނުގައި ހިންގަމުންދާ ގަތުލުއާންމާ ދެކޮޅަށް ސިލްސިލާކޮށް އަޑުއުފުލަމުން ގެންދާ ދެ މީހުނެވެ. ފާއިތުވި ދުވަސްތަކުގައި ވަނީ ސައުދީ ސަފީރު ހުޅުމާލެގައި ދިރިއުޅުއްވާ ގެކޮޅުކައިރިއަށް އެއްވެ އަޑުއުފުލާފަ އެވެ.