ބޮލީވުޑްގެ މަޝްހޫރު ތަރިއެއް ކަމަށްވާ ސަންޖޭ ދަތު، އުމުރުން 65 އަހަރުގައި އޭނާގެ އަންހެނުން މަންޔަތާ ދަތުއާ އަލުން ކައިވެނި ކޮށްފި އެވެ.

ސޯޝަލް މީޑިއާގައި މިހާރު ދައުރުވަމުން އަންނަ ވީޑިއޯއެއްގައި ފެންނަނީ ސަންޖޭއާއި މަންޔަތާ މުމްބާއީގެ ފައްޅިއެއްގައި ހިންދޫ ދީނުގެ އުސޫލުތަކުގެ މަތިން ކައިވެނިކުރާ މަންޒަރެވެ.

ސަންޖޭއާއި މަންޔަތާ އަލުން ކައިވެނި ކޮށްފައި މިވަނީ އެމީހުން ކައިވެނި ކޮށްގެން އުޅޭތާ 16 އަހަރު ފަހުންނެވެ. އެ ދެމީހުން އެންމެ ފުރަތަމަ ކައިވެނިކުރީ 2008 ވަނަ އަހަރު އެވެ.

އެ ކައިވެންޏަށް އެއްމާބަނޑު ދެ ކުދިން ލިބިފައިވާއިރު އެ އާއިލާއިން އުޅެމުން އަންނަނީ އުފާވެރި ދިރިއުޅުމެއް ކަމަށް އެމީހުންގެ ގާތް މީހުން ބުނެ އެވެ.

މަންޔަތާއާ ކައިވެނި ކުރުމުގެ ކުރިން ސަންޖޭ ދެ ކައިވެންޏެއް ކޮށްފައިވެ އެވެ. 1987 ވަނަ އަހަރު ރިޗާ ޝަރްމާއާއެކު ކުރި ކައިވެންޏަށް އަންހެން ދަރިއަކު ލިބިފައިވަނިކޮށް ރިޗާ މަރުވީ 1996 އަހަރު އެވެ.

އޭގެ ފަހުން 1998 ވަނަ އަހަރު ރިއާ ޕިއްލޭއާ ސަންޖޭ ކުރި ކައިވެނި ރޫޅުނީ 2008 ވަނަ އަހަރު މަންޔަތާއާ ކައިވެނި ކުރުމުގެ ކުރިންނެވެ.

ސަންޖޭގެ ޒާތީ ދިރިއުޅުމުގެ ހަބަރުތަކަކީ އަބަދުވެސް އިންޑިއާގެ މީޑިއާގައި ބޮޑު ސަމާލުކަމެއް ދީގެން އަޑުގަދަކޮށް ދެކެވޭ ހަބަރުތަކެކެވެ.